Ուսման Ֆայը, որն ապրում և աշխատում է Ստեփանակերտում, ասում է, որ իր համար աշխարհի ամենալավ, մաքուր ու գեղեցիկ տեղը Ղարաբաղն է, որտեղ դեմ չէր լինի ապրել ամբողջ կյանքում, արդեն ունի լավ ընկերներ, քաղաքն ընդունել է նրան։ Այս մասին նա պատմել է «Ամերիկայի ձայն»-ին։
Ֆայը մի քանի տարի առաջ՝ մինչև պատերազմը, երեք ընկերների հետ տեղափոխվել էր Ստեփանակերտ և սկսել խաղալ Արցախի հավաքականում։
Նա լեզուն սովորել է և վարժ խոսում է հայերեն, ազատորեն շփվում արցախցի փոքրիկների հետ։
«Առավոտյան դուռը թակում, հարցնում են՝ Ուսմանը վեր կացե՞լ է»,- ասում է ֆուտբոլիստն ու ավելացնում, որ սիրում է երեխաների հետ ֆուտբոլ խաղալ։
Նա ծիծաղում է, պատմում է Ստեփանակերտի կյանքի մասին, թե ինչպես են մարդիկ երբեմն արձագանքում իրեն:
«Մի անգամ փողոցում մի երեխա, ինձ տեսնելով, մորն ասաց՝ տես, մայրիկ, այս մարդը շատ շոկոլադ է կերել»։
Ուսմանը 3 տարի 6 ամիս է, ինչ ապրում է Արցախում և չի բացառում, որ այստեղ կհաստատվի։
«Հադրութից և Շուշիից շատ ներքին տեղահանվածներ դեռևս բնակարանային խնդիրներ են լուծում»,- ասում է Ուսմանը։ Հեռանալով Սենեգալ՝ նա իր հետ տանում է հայկական փախլավա և ժենգյալով հաց։ Հազար հատ տանում եմ, ասում է նա։
Ուսման Ֆայը մտածում է ապագա ընտանիքի մասին։ Ուզում է ամուսնանալ մաքուր սրտով գյուղացի աղջկա հետ։
«Այժմ ամբողջ աշխարհում շատ դժվար է լավ աղջիկ գտնելը»,- ասում է Ուսմանը, սակայն նշում, որ իր համար գույնը կապ չունի, կարևորը սիրտը սպիտակ լինի։ Նա համոոզված է, որ մայրը կընդունի նրան, ում ինքն է հավանում։
