Ստեփանակերտի էլեկտրամատակարարումը վերականգնվել է, հայտնել է Արցախի նախկին պետնախարար, պետնախարարի նախկին խորհրդական Արտակ Բեգլարյանը:
«Րոպոներ առաջ Ստեփանակերտում լույս տվեցին, աա կարևոր քայլ է մարդկանց տառապանքները մեղմելու համար։ Քաղաքը սեպտեմբերի 19-ից առանց Էլեկտրականության Է եղել»,-իր տելեգրամյան ալիքում գրել է Բեգլարյանը։
Միևնույն ժամանակ ադրբեջանական ԶԼՄ-ները, հղում անելով երկրի նախագահի աշխատակազմին, հայտնել են, որ Ստեփանակերտն անջատված է Հայաստանի էներգահամակարգից և միացված է Ադրբեջանի էներգահամակարգին: Նշվում է, որ այս գործընթացն իրականացվել է Եվլախում սեպտեմբերի 21-ին ձեռք բերված պայմանավորվածությունների շրջանակներում:
Սեպտեմբերի 19-ին Ադրբեջանը լայնամասշտաբ հարձակում է սկսել Արցախի Հանրապետության նկատմամբ։ Վերջին տվյալներով կա 200 զոհ և 400 վիրավոր։ Ադրբեջանի պաշտպանության նախարարությունը հայտարարել էր ԼՂ-ում զինված գործողություն սկսելու մասին։ Ադրբեջանի ՊՆ-ն նշել էր, որ, իբր, քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»:
ԼՂ-ում տեղակայված ռուսական խաղաղապահ զորակազմի հրամանատարության միջնորդությամբ պայմանավորվածություն էր ձեռք բերվել 2023 թվականի սեպտեմբերի 20-ի ժամը 13:00-ից մարտական գործողություններն ամբողջությամբ դադարեցնելու մասին, բայց Ադրբեջանը չպահեց պայմանավորվածությունը և երեկ՝ սեպտեմբերի 21-ին, կրկին խախտել էր հրադադարը։
Ըստ համաձայնության՝ սեպտեմբերի 21-ին հանդիպում տեղի ունեցավ Եվլախում։ Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը հայտարարել էր, որ Եվլախում տեղի ունեցած բանակցությունները կարող են հանգեցնել Բաքվի և Երևանի միջև խաղաղության պայմանագրի կնքմանը։ Սեպտեմբերի 21-ին ավելի ուշ պաշտոնական Ստեփանակերտը հայտարարեց, որ գործնական մթնոլորտում անցած հանդիպման ընթացքում քննարկվել են երկուստեք կարևորություն ունեցող մի շարք հարցեր: Ըստ Ստեփանակերտի՝ կողմերը հատուկ ընդգծել են, որ առկա բոլոր հարցերն անհրաժեշտ է քննարկել խաղաղ մթնոլորտում՝ հանդիպումները շարունակելու պատրաստակամությամբ։
