Ադրբեջանական կողմը հայտնել է այսօր Իվանյանում Արցախի ներկայացուցիչների հետ հանդիպման մանրամասները, տեղեկացրել են ադրբեջանական ԶԼՄ-ները՝ հղում անելով Ադրբեջանի նախագահի աշխատակազմին։
Ադրբեջանական կողմը նշդել է, որ «հանդիպումը կառուցողական մթնոլորտում է անցել»։
Նշվում է, որ «Ադրբեջանի Հանրապետության փոխվարչապետ Շահին Մուստաֆաևի գլխավորած սոցիալ-հումանիտար, տնտեսական և ենթակառուցվածքային հարցերի լուծման աշխատանքային խմբի անդամների գործունեության ընթացիկ ուղղությունները որոշելու նպատակով հանդիպում կազմակերպելու պայմանավորվածություն է ձեռք բերվել»։
Ըստ ադրբեջանական կողմի՝ հանդիպման նպատակն համատեղ աշխատանքային խումբ ստեղծելն է Արցախի այն ներկայացուցիչների հետ, որոնք զբաղվում են կոմունալ, բժշկական և քաղաքացիական այլ գործունեությամբ։
Սեպտեմբերի 25-ին հայտնել էինք, որ տեղի է ունեցել երկրորդ հանդիպումը՝ Արցախի և Ադրբեջանի ներկայացուցիչների միջև:
Պատերազմական գործողություններից հետո առաջին բանակցությունները կայացել են սեպտեմբերի 21-ին՝ Եվլախ քաղաքում։ Հայկական պատվիրակությունը գլխավորել է Արցախի ԱԺ «Արցախի ժողովրդավարական կուսակցություն» խմբակցության պատգամավոր Դավիթ Մելքումյանը։ Ադրբեջանը բանակցություններում ներկայացրել է պատգամավոր Ռամին Մամեդովը։
Սեպտեմբերի 19-ին Ադրբեջանը լայնամասշտաբ հարձակում է սկսել Արցախի Հանրապետության նկատմամբ։ Վերջին տվյալներով կա 200 զոհ և 400 վիրավոր։ Ադրբեջանի պաշտպանության նախարարությունը հայտարարել էր ԼՂ-ում զինված գործողություն սկսելու մասին։ Ադրբեջանի ՊՆ-ն նշել էր, որ, իբր, քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»:
ԼՂ-ում տեղակայված ռուսական խաղաղապահ զորակազմի հրամանատարության միջնորդությամբ պայմանավորվածություն էր ձեռք բերվել 2023 թվականի սեպտեմբերի 20-ի ժամը 13:00-ից մարտական գործողություններն ամբողջությամբ դադարեցնելու մասին, բայց Ադրբեջանը չպահեց պայմանավորվածությունը և սեպտեմբերի 21-ին, կրկին խախտել էր հրադադարը։
Ըստ համաձայնության՝ սեպտեմբերի 21-ին հանդիպում տեղի ունեցավ Եվլախում։ Ադրբեջանի նախագահի հատուկ հանձնարարությունների գծով ներկայացուցիչ Էլչին Ամիրբեկովը հայտարարել էր, որ Եվլախում տեղի ունեցած բանակցությունները կարող են հանգեցնել Բաքվի և Երևանի միջև խաղաղության պայմանագրի կնքմանը։ Սեպտեմբերի 21-ին ավելի ուշ պաշտոնական Ստեփանակերտը հայտարարեց, որ գործնական մթնոլորտում անցած հանդիպման ընթացքում քննարկվել են երկուստեք կարևորություն ունեցող մի շարք հարցեր: Ըստ Ստեփանակերտի՝ կողմերը հատուկ ընդգծել են, որ առկա բոլոր հարցերն անհրաժեշտ է քննարկել խաղաղ մթնոլորտում՝ հանդիպումները շարունակելու պատրաստակամությամբ։
