ՄԱԿ-ը շուտով առաքելություն կուղարկի Լեռնային Ղարաբաղ՝ Բաքվի խնդրանքի հիման վրա, հայտնել է Ադրբեջանի արտաքին գործերի նախարարության խոսնակ Այխան Հաջիզադեն, հայտնել են տեղի ԶԼՄ-ները:
Նրա խոսքով՝ ՄԱԿ-ի առաքելությունը հնարավորություն կունենա ծանոթանալու Ադրբեջանի կողմից ղարաբաղյան տարածաշրջանում իրականացվող մարդասիրական ընթացիկ գործունեությանը։
ԱԳՆ ներկայացուցիչը նաև նշել է, որ պատվիրակության անդամներին կցուցադրվեն ենթակառուցվածքների վերականգնումը, «Հայաստանի անօրինական զինված խմբավորումների զինաթափման և զենքի առգրավման գործընթացը, ինչպես նաև տարածաշրջանում ականների սպառնալիքի հետ կապված ռիսկերը»։
Սեպտեմբերի 19-ին Ադրբեջանը լայնամասշտաբ հարձակում սկսեց Արցախի Հանրապետության նկատմամբ։ Վերջին տվյալներով կա 200 զոհ և 400 վիրավոր։ Ադրբեջանի պաշտպանության նախարարությունը հայտարարել էր ԼՂ-ում զինված գործողություն սկսելու մասին։ Ադրբեջանի ՊՆ-ն նշել էր, որ, իբր, քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»:
ԼՂ-ում տեղակայված ռուսական խաղաղապահ զորակազմի հրամանատարության միջնորդությամբ պայմանավորվածություն էր ձեռք բերվել 2023 թվականի սեպտեմբերի 20-ի ժամը 13:00-ից մարտական գործողություններն ամբողջությամբ դադարեցնելու մասին: Ըստ համաձայնության՝ սեպտեմբերի 21-ին հանդիպում տեղի ունեցավ Եվլախում։ Արցախի և Ադրբեջանի ներկայացուցիչների միջև երկրորդ հանդիպումը տեղի ունեցավ սեպտեմբերի 25-ին՝ Իվանյանում։ Սեպտեմբերի 28-ին Արցախի նախագահ Սամվել Շահրամանյանը ԱՀ պետական համակարգը լուծարելու հրամանագիր է ստորագրել, որով Արցախի Հանրապետությունը դադարում է գոյություն ունենալ։
