Հայկական գինիները չորս մեդալ են ստացել Գերմանիայում և Ֆրանսիայում տեղի ունեցած մրցանակաբաշխությունների ժամանակ

Armenia Wine-ի օրգանական Bione գինին Գերմանիայում և Ֆրանսիայում արժանացել է չորս մեդալի, հայտնում է Gastro Vino նախագիծը։

Գերմանական Organic Wine Awards International և French Concours International des Produits Biologiques մրցույթների ժամանակ օրգանական շարքի չոր սպիտակ գինին արժանացել է երկու ոսկի, իսկ կարմիրը՝ երկու արծաթե մեդալի։

Գինեգործարանի գլխավոր խորհրդատու, ֆրանսիացի մասնագետ Ժան-Բատիստ Սուլանը Հայաստանն անվանել է օրհնված միջավայր օրգանական գյուղատնտեսության համար և հայտարարել օրգանական գինեգործության փորձը մյուս արտադրողների հետ կիսելու իր պատրաստակամության մասին։

Concours International des Produits Biologiques-ը տեղի է ունեցել մայիսի 15-ին՝ Լիոնում, որտեղ միջազգային ժյուրին գնահատել է 577 օրգանական գինիներ, գարեջուրներ և այլ խմիչքներ ամբողջ աշխարհից: Organic Wine Awards International մրցանակաբաշխությունը տեղի է ունեցել Ֆրասդորֆում։ 

2024 թվականին Հայաստանը կհյուրընկալի UNWTO համաշխարհային գինու զբոսաշրջության ութերորդ համաժողովը։ Նախկինում Forbes-ը նշել էր հինգ հայկական բուտիկ գինեգործարաններ, որոնք խորհուրդ է տալիս այցելել՝ ելնելով նրանց գինիների յուրահատկությունից, համից և խառնուրդից, խմորման և հնեցման եղանակներից և միայն մեկ կումով գինեգործության պատմությունը պատմելու կարողությունից: Simpe wine news-ն էլ պատմել է հայկական գինիների ակնառու օրինակների մասին։