Սիրիայում Հայաստանի դեսպանությունը Հալեպի և նրա շրջակայքի հայ բնակչությանը կոչ է արել զերծ մնալ տեղաշարժից և ամբողջությամբ բացառել քաղաքը լքելու փորձերը։ Դեսպանատունը կազմակերպված տարհանումն անհնար է անվանել։
Հալեպում Հայաստանի գլխավոր հյուպատոսն այժմ աշխատում է Դամասկոսում Հայաստանի դեսպանատան մոտ, հաղորդում է դիվանագիտական առաքելությունը։ Տեղի հայերին օգնություն ցուցաբերելու համար դեսպանությունը թեժ գիծ է ստեղծել՝ +963 96 000 36 22 հեռախոսահամարով։
Դեսպանատունը հավելել է, որ Սիրիայի ծագումով հայ քաղաքացիները և Հայաստանի քաղաքացիություն ստանալու համար դիմած անձինք կարող են դիմել Դամասկոսում կամ Բեյրութում գտնվող դեսպանատներ և պարզեցված ձևով ստանալ Հայաստան մուտքի վիզա։
«Ներկայումս վերջնական տեսքի են բերվում պատրաստի անձնագրերի ցուցակները։ Անձնագրային գործեր կան, որոնք դեռ ընթացքի մեջ են և Հայաստանում են։ Պատրաստի անձնագրերը տերերին փոխանցելու ուղիների որոնում է իրականացվում։ Իրավիճակի մասամբ կայունանալուց հետո հյուպատոսությունը կկապվի հասցեատերերի հետ և կտեղեկացնի, թե որտեղ և ինչպես կարող են ստանալ անձնագրերը»,- ասվում է հաղորդագրության մեջ։
Նոյեմբերի 27-ին սիրիական մի շարք խմբավորումների զինյալներ՝ «Հայաթ Թահրիր ալ-Շամ» իսլամիստական խմբավորման գլխավորությամբ, հարձակում էին սկսել Սիրիայի հյուսիս-արևմուտքում կառավարական ուժերի դեմ: Նրանք գրավել էին Դամասկոսի և Հալեպի միջև ընկած ճանապարհը, որի հետևանքով զոհվել էր շուրջ 200 մարդ, այդ թվում՝ խաղաղ բնակիչներ։
Ըստ AP-ի՝ նոյեմբերի 30-ին գրոհայինները ներխուժել էին Հալեպ և վերահսկողություն հաստատել Սարաքեբ քաղաքի վրա, որը գտնվում է Հալեպը Դամասկոսի և ափի հետ կապող մայրուղիների ռազմավարական խաչմերուկում: Նոյեմբերի 30-ին սիրիական բանակը հաստատել էր գրոհայինների ներթափանցումը Հալեպ։
ՀՀ ՊՆ-ն նոյեմբերի 30-ին հայտնել էր, որ Հայաստանի իշխանությունները որոշում են կայացրել ժամանակավորապես կասեցնել ՀՀ-ի՝ 2019 թվականից Սիրիայի Հալեպի տարածաշրջանում գործող հումանիտար առաքելության գործունեությունը։ ՀՀ ԱԳՆ-ի տվյալներով՝ Սիրիայում տուժածների շրջանում ՀՀ քաղաքացիներ չկան։
