«Թալիբան» շարժման մամուլի խոսնակը հայտարարել է, որ ոչ ոքի թույլ չեն տալու լքել Աֆղանստանը մինչև նոր կառավարության կազմի հայտարարումը: Այս մասին հայտնում է parstoday.com-ը։
Ինչպես հաղորդում է ԻՌՆԱ գործակալությունը, Զաբիհուլլա Մուջահիդը երեքշաբթի լրատվամիջոցներին տեղեկացրել է, որ նոր կառավարության կազմի հաստատումից և արտաքին ու ներքին գործերի նախարարների ընտրությունից հետո յուրաքանչյուր ոք, ով ունի իրավական փաստաթուղթ, կկարողանա լքել երկիրը:
Ավելի վաղ ամերիկյան աղբյուրները հայտնել էին, որ ԱՄՆ քաղաքացիներին և նրանց գործընկերներին տեղափոխող չորս ինքնաթիռ պատրաստվում էր օդ բարձրանալ Աֆղանստանի հյուսիսում գտնվող օդանավակայանից, սակայն արգելափակվել է թալիբների կողմից:
Թեև անհասկանալի է, թե ինչու է հետաձգվել Թալիբանի նոր կառավարության կազմի հայտարարումը, կան ենթադրություններ, որ թալիբները ներքին տարաձայնություններ ունեն մի շարք կարևոր հարցերի շուրջ, այդ թվում՝ վարչապետի ընտրության և Փանջշիրի պատերազմի շարունակության, որոնք հետաձգում են «Թալիբանի» նոր կառավարության կազմի հայտարարումը:
