Շրի Լանկայում բողոքի զանգվածային ակցիաներ են․ ցուցարարները ներխուժել են նախագահական նստավայր

Շրի Լանկայում բողոքի զանգվածային ակցիաների մասնակիցները, որոնք հանդես են գալիս երկրի գործող նախագահ Գոթաբաի Ռաջապաքսայի պաշտոնաթողության օգտին, Կոլոմբոյում ներխուժել են պետության ղեկավարի նստավայրի գլխավոր շենք: Այս մասին հայտնել է Daily Mirror պարբերականը։

Պարբերականի տվյալներով՝ նախագահի թիկնազորը չի կարողացել կանգնեցնել ցուցարարներին։ Ոստիկանությունը արցունքաբեր գազ է կիրառել և օդ կրակել, սակայն դա նրանց չի կանգնեցրել։

Ավելի վաղ Agence France-Presse-ը (AFP), վկայակոչելով տեղական հեռուստատեսությունը, հայտնել էր, որ ցուցարարները ներխուժել են շենքի տարածք: Պաշտպանության նախարարությունում գործակալության աղբյուրի տեղեկատվության համաձայն՝ պետության ղեկավարին հաջողվել է հեռանալ նստավայրից ցուցարարների մտնելուց րոպեներ առաջ: Նույն աղբյուրը AFP-ին հայտնել է, որ Ռաջապաքսին դեռևս համարվում է երկրի նախագահ․ և այս պահին պահպանվում է զինվորականների կողմից: Նրա գտնվելու վայրի մասին տեղեկություններ չեն հաղորդվում։

Շաբաթ օրը հազարավոր մարդիկ դուրս են եկել Կոլոմբոյի փողոցներ՝ պահանջելով Ռաջապաքսայի հրաժարականը։ Նրանց հաջողվել է ճեղքել շրջափակումը և մտնել նախագահի նստավայրի տարածք։ Բողոքի ակցիաներում տուժել է 32 մարդ, այդ թվում՝ մի քանի ոստիկան։