ԲՀԿ-ական պատգամավոր Իվետա Տոնոյանը «Ֆեյսբուք»-յան իր էջում հայ-ադրբեջանական սահմանագոտու Տավուշի հատվածում առաջացած լարվածության վերաբերյալ գրառում է արել՝ փոխանցելով ԲՀԿ առաջնորդ Գագիկ Ծառուկյանի դիրքորոշումը ստեղծված իրավիճակի վերաբերյալ։
«Այսօր, երբ Ադրբեջանի ռազմաքաղաքական ղեկավարությունը կրկին անցել է ակնհայտ սադրանքների, երբ հայ-ադրբեջանական պետական սահմանին երեկվանից իրավիճակը լարված է, երբ գնդակոծվում են խաղաղ գյուղեր ու բնակավայրեր, երբ առաջնագծում հանուն մեր անվտանգության կենաց ու մահու կռիվ է տալիս հայ զինվորը, երբ երկրի անվտանգության հարցը վեր է ամեն ինչից, յուրաքանչյուրիս պարտքն է միավորել բոլոր ջանքները հանուն մեր երկրի ու ժողովրդի պաշտպանության, հանուն արտաքին թշնամու դեմ պայքարի»,-գրել է պատգամավորը։
Նա նշել է, որ սա այս իրավիճակում ԲՀԿ նախագահ Գագիկ Ծառուկյանի սկզբունքային դիրքորոշումն է ու հանձնարականը ԲՀԿ քաղաքական թիմի յուրաքանչյուր անդամին: «Ստեղծված պատերազմական իրավիճակում ներքաղաքական բոլոր հարցերը դառնում են այլևս երկրորդական, քանի որ բոլորիս գերխնդիրը մեկն է՝ լինել միասնական, լինել պետության կողքին, համատեղ ջանքերով դիմակայել թշնամու ոտնձգություններին և արժանի հակահարված հասցնել նրան»,-ընդգծել է Տոնոյանը։