Հայրենիքի փրկության շարժումը փետրվարի 18-ին հանրահավաք կանցկացնի։ Առաջիկայում լինելու են և՛ բողոքի ցույցեր, և՛ անհնազանդության շարժումներ։ Այս մասին «Եռաբլուր» զինվորական պանթեոնում լրագրողների հետ ճեպազրույցում, ներկայացնելով առաջիկա անելիքները, հայտնեց Հայրենիքի փրկության շարժման համակարգող, ՀՅԴ Գերագույն մարմնի ներկայացուցիչ Իշխան Սաղաթելյանը։ Նա անդրադարձավ նաև Հայրենիքի փրկության շարժման հասցեին հնչող քննադատություններին․
«Այո, մեզ մեղադրում են ոչ վճռական գործողությունների մեջ։ Սակայն, մենք ասել ենք, թե որն է այս չարիքի կառավարությանը հեռացնելու ճանապարհը։ Այո, Նիկոլ Փաշինյանի հեռացման համաժողովրդական պահանջ կա, մենք չենք կարողացել վերածել այն համաժողովրդական պայքարի»,- խոստովանեց Իշխան Սաղաթելյանը, սակայն, խոստացավ, որ պայքարը վերածելու են համաժողովրդականի։
Ասում է՝ իրականությանը չեն համապատասխանում այն կարծիքները, թե Հայրենիքի փրկության շարժումը մարել է։ Իշխան Սաղաթելյանը հերքեց նաև այն լուրերը, թե շարժման հետևում կանգնած են Սերժ Սարգսյանն ու Ռոբերտ Քոչարյանը։
Խոսելով նաև Հայրենիքի փրկության շարժման պառակտման մասին, ՀՅԴ Գերագույն մարմնի ներկայացուցիչը նկատեց, որ իրենք որևէ մեկին չեն խնդրելու միանալ իրենց կամ հեռանալ։
Հայրենիքի փրկության շարժման համակարգողը կրկին պնդեց, որ հիմա ճիշտ չէ արտահերթ խորհրդարանական ընտրություններ անցկացնելը, քանի որ Փաշինյանի գլխավորությամբ ընտրություններ անցկացնելու դեպքում երկրում շարունակվելու է պահպանվել անկայունությունը։
«Ինքն ամեն ինչ անելու է, որ վերարտադրվի, որպեսզի չդատվի։ Տարօրինակ է այս մարդու պահվածքը. մենք իր հրաժարականն ենք ուզում, ինքը խորհրդարանն է տանում լուծարման, որ այդ ճանապարհով շարունակի վերարտադրվել»,-նշեց նա:
Սաղաթելյանի կարծիքով՝ Փաշինյանն ու նրա թիմը շարունակում են մեղավորներ փնտրել:
Հիշեցեննք, որ Բանակի օրվի առթիվ «Եռաբլուր» զինվորական պանթեոն են այցելել նաև ՀՅԴ ներկայացուցիչները։
