Բաքվում պահվող հայ ռազմագերիների հարազատները գիշերել են Կառավարության շենքի դիմաց։ Նրանք շարունակում են երեկվանից սկսած բողոքի ակցիան։ Այս մասին հայտնում է Armenia Today-ի թղթակիցը։
Հիշեցնենք, որ ռազմագերիների հարազատները երեկվանից հավաքվել էին Կառավարության շենքի դիմաց և հանդիպում էին պահանջում վարչապետ Նիկոլ Փաշինյանի հետ։
Վարչապետի մամուլի խոսնակ Մանե Գևորգյանն անդրադարձել է կառավարության շենքի դիմաց Խծաբերդում գերեվարված շիրակցի զինվորների հարազատների նստացույցին: Խոսնակը նշել է՝ գերեվարվածների հարազատները գիտեն, որ վարչապետի հետ պարբերաբար հանդիպումներ ունենալու հնարավորություն ունեն և դրա համար առկա է կոնկրետ մեխանիզմ:
Հավելենք, որ խաղաղ ակցիայի նպատակը, ինչպես գերեվարվածների հարազատներն են ասում, կառավարության անդամներից, պատկան մարմիններից գերիների ճակատագրի մասին որոշակի տեղեկատվություն ստանալն է, թեպետ այս առումով մեծ հույսեր չունեն։ Գերիների հարազատների խոսքով՝ մինչև այս կայացած հանդիպումներն արդյունք չեն տվել։
Ըստ ակցիայի մասնակիցների՝ իշխանություններն իրենց հույս են տվել, բայց այլևս չեն կարող սպասել, պատրաստ են ամեն քայլի՝ նստացույցեր, հացադուլներ, որպեսզի իշխանությունները վերջապես գործուն քայլեր անեն գերիներին վերադարձնելու հարցը լուծելու համար։
