ԱԺ «Քաղաքացիական պայմանագիր» խմբակցության պատգամավոր Հակոբ Ասլանյանը հայտարարել է, որ շարունակում է մնալ «Քաղաքացիական պայմանագիր» կուսակցության և խմբակցության լիարժեք անդամ։
««Քաղաքացիական պայմանագրի» հետ համագործակցությունս կասեցնելու վերաբերյալ իմ այսօրվա հայտարարությունը հիմնված էր սխալ տեղեկությունների վրա: Առավել ևս՝ այս պարագայում հայտարարությունս համարում եմ սխալ և էմոցիոնալ: Հայտարարում եմ, որ շարունակում եմ մնալ կուսակցության և խմբակցության լիարժեք անդամ և գործելու եմ համաձայն կուսակցության ղեկավար մարմնի և խմբակցության որոշումների: Միևնույն ժամանակ՝ համաձայն եմ, որ կուսակցությունը պետք է առաջնորդվի բարեվարքության բարձր սկզբունքներով»,- Ֆեյսբուքի իր էջում գրել է Ասլանյանը:
Պատգամավորը հայտարարության տեքստի սքրինշոթը հրապարակել է Facebook-ում։ ՔՊ-ի հետ համագործակցության կասեցման մասին իր այսօրվա հայտարարությունը «սխալ ու զգացմունքային» անվանելով՝ պատգամավորն ասել է, որ դրա հիմքում ընկած է «սխալ տեղեկություն»։ 24News-ի հետ զրույցում նա հայտարարել է, որ իր վրա ճնշում չի գործադրվել ՔՊ-ի անդամակցության որոշումը փոխելու համար։
Ավելի վաղ Ասլանյանը Facebook-ում հրապարակել էր Բարձր տեխնոլոգիական արդյունաբերության նախարար Մխիթար Հայրապետյանի հետ նամակագրության սքրինշոթը, որից երևում է, որ նա նախարարից ստացել է կուսակցականությունը պահպանելու մասին հայտարարության տեքստը։ Ավելի ուշ պատգամավորը ջնջել է այդ նկարը։
Հայրապետյանի մամուլի քարտուղար Կարինե Տերտերյանը մեկնաբանել է նախարարի հետ նամակագրության մի հատվածի հրապարակումը։ Նրա խոսքով՝ պատգամավորը Հայրապետյանի դպրոցի ուսուցիչն է եղել, իսկ 2016 թվականին նախարարի աջակցությամբ միացել է «Քաղաքացիական պայմանագրին»։
«Ասլանյանն այսօր խորհրդակցել է նախարարի հետ և օգնություն խնդրել իր հայտարարության տեքստի հետ կապված»,- ասել է գերատեսչության ներկայացուցիչը։
Ավելի վաղ պատգամավորը հայտարարել էր, որ մեկ ամսով կասեցնում է ՔՊ-ի հետ համագործակցությունը։
