Այսօր Գավառ քաղաքի Լ․ Քալանթարի անվան պետական թատրոնի դահլիճում տեղի ունեցավ Հայոց բանակի հիմնադրման 29-րդ տարեդարձին նվիրված նիստ, որին մասնակցել են ՀՀ ԶՈւ բանակային երկրորդ կորպուսի հրամանատարական կազմը և զինվորները, Գեղարքունիքի մարզպետարանի, մարզի համայնքների ներկայացուցիչներ, ինչպես նաև Հայ Առաքելական եկեղեցու Գեղարքունյաց թեմի հոգևոր դասը: Այս մասին իր Facebook-ի էջում
գրել է Գեղարքունիքի մարզպետ Գնել Սանոսյանը:
«Մինչև նիստի մեկնարկը ծաղկեպսակ դրեցինք և ծաղիկներ խոնարհեցինք Հայրենյաց պաշտպանի հուշարձանին, որից հետո Գավառի Սուրբ Աստվածածին եկեղեցում կատարվեց մոմավառություն եւ հնչեցվեց Պաշտպանիչ աղոթք՝ հայրենի աշխարհի եւ հայրենի մարզի ապահովության ու անսասանության համար։ Նիստի մեկնարկին մեկ րոպե լռությամբ հարգեցինք 2020 թվականի Արցախյան պատերազմում զոհված հայորդիների հիշատակը։ Օրհնության խոսքով հանդես եկավ Հայ Առաքելական եկեղեցու Գեղարքունյաց թեմի առաջնորդական տեղապահ Պարթեւ վարդապետ Բարսեղյանը։
Վարդապետը նշեց,որ հայոց բանակը մեր ազգի կարևորագույն ձեռքբերումներից մեկն է, որը տասնամյակներ շարունակ ապահովել է Հայաստանի եւ Արցախի խաղաղությունն ու անվտանգությունը, բազմաթիվ անգամներ առիթ տվել, որ մենք հպարտանանք նրա կերտած հաղթանակներով։ Հայ Առաքելական եկեղեցին մշտապես եղել է Հայոց բանակի՝ այդ հաղթանակների կողքին։ Դժբախտաբար, այդ հաղթանակների շղթան ընդհատվեց 2020 թվականի Արցախյան պատերազմում, երբ մեր բանակն ու ժողովուրդն անցան ծանր փորձության միջով։ Մենք պարտվեցինք, բայց պարտված դուրս չեկանք այդ պատերազմում, քանզի մեզ հասած փորձությունը բոլորիս պարտադրում ու ստիպում է ոտքի կանգնել, համախմբվել ու կերտել նոր հաղթանակներ։ Վարդապետը աղոթք հնչեցրեց մեր բանակի և պետականության ապագա հաղթանակների համար, հայրենիքի սահմանները պաշտպանելիս զոհված մեր հայորդիների հոգիների հանգստության, վիրավոր զինծառայողների ապաքինման, աշխարհի խաղաղության համար։ Մեր սրբացած զավակների արյամբ է ոռոգվել հայոց հողը, որից կծնվեն նոր հերոսամարտիկներ։
Իմ շնորհավորական խոսքում շեշտեցի, որ հունվարի 28-ը մշտապես նշել ենք բարձր տրամադրությամբ, սակայն այս տարի այն ավելի շատ ոգեկոչման եւ խոնարհումի օր էր։ Իմ խոնարհումը բերեցի 2020 թվականի Արցախյան պատերազմում հերոսացած մեր տղաներին, ովքեր ամենաթանկը՝ իրենց կյանքը, նվիրաբերեցին հանուն հայրենիքի։ Խոնարհումս բերեցի նաևմեր այն զինվորներին ու կամավորներին, ովքեր մարտական գործողությունների մասնակից եղան և այժմ էլ ապրում են մեր կողքին։ Պատերազմը իսկապես ծանր էր և ընթանում էր անհավասար պայքարում, բայց մեր հրամանատարներն ու զինվորները բազմաթիվ դրվագներում հերոսական պայքար մղեցին։ Բազմաթիվ բնագծերում մենք մնացինք այնտեղ, որտեղ տարիներ ի վեր կանգնած ենք եղել։ ՀՀ ԶՈՒ երկրորդ բանակային կորպուսը հսկայական ներդրում ունի այդ դրվագների մեջ։
Նիստի ավարտին տեղի ունեցավ պարգևատրման արարողություն, որի ժամանակ Գեղարքունիքի մարզպետի շնորհակալագրով խրախուսեցի մոտ 500 հոգու։
2020 թվականի սեպտեմբերի 27-ին Հայաստանի Հանրապետությունում հայտարարված ռազմական դրությամբ պայմանավորված ծառայողական պարտականությունները լավագույնս կատարելու համար ՀՀ Գեղարքունիքի մարզպետի շնորհակալագրով խրախուսվել են ՀՀ ԶՈւ 2-րդ բանակային կորպուսի հրամանատարը եւև մի խումբ զինվորականներ, այդ թվում՝ հակաօդային պաշտպանության, Գեղարքունիքի մարզի ուժային կառույցների ղեկավարներ եւ աշխատակիցներ, ՀՀ ԱԻՆ ՓԾ Գեղարքունիքի մարզային վարչության պետը եւ վարչության աշխատակիցներ, Գեղարքունիքի մարզպետարանի աշխատակիցներ, ԶԼՄ-ների ներկայացուցիչներ:
Արցախյան 44-օրյա պատերազմին մասնակցելու համար ՀՀ Գեղարքունիքի մարզպետի շնորհակալագրով խրախուսվել են մարզի համայնքների ղեկավարներ, համայնքների բնակավայրերի վարչական ղեկավարներ, Գեղարքունիքի մարզպետարանի աշխատակիցներ»,-գրել է մարզպետը: