«Տաշիր» ընկերությունների խմբի առաջին փոխնախագահ Տաթևիկ Կարապետյանը Armenia Today-ին տված հարցազրույցում խոսել է սեպտեմբերի 20-ին Երևանում կայացած հայկական գործարար համաժողովի իր տպավորություններից և ակնկալիքներից, պատմել Հայաստանում և Արցախում գործող «Տաշիր» ընկերությունների խմբի նախագծերի մասին: Նա նշել է իր տեսլականը, թե ինչպես կինը բիզնեսում հաջողակ լինի:
– Դուք գրել էիք, որ «Տաշիր» ընկերությունների խմբի և դրա ստեղծած Հայ ձեռներեցների ասոցիացիայի նախաձեռնած խոշոր բիզնես նախագծի մեկուկես տարվա դադարից հետո Հայաստան եք եկել: Ֆորումում ընտրվել են ներդրումների համար սկսնակ նախագծեր, կնքվել են ռազմավարական կարևոր համաձայնություններ: Ինչպիսի՞ն են այս ստարտափ- նախագծերի հեռանկարները՝ հաշվի առնելով բիզնես ծրագրերի հետ աշխատելու ձեր փորձը: Անձամբ ի՞նչ խորհուրդ կտաք ֆորումի մասնակիցներին, ստարտափերներին` ներդրումների պոտենցիալ հասցեատերերին:
– Ուրախ էի դառնալ խոշորագույն և շատ առումներով եզակի բիզնես ֆորումի մասնակից: Ես այցելել եմ այս կարգի բազմաթիվ միջազգային հարթակներ, և ուզում եմ նշել, որ Երևանում մեզ հաջողվեց կազմակերպել և անցկացնել ձևով և բովանդակությամբ իսկապես լայնածավալ միջոցառում: Փաստորեն, Հայաստանում հարթակ է հայտնվել տնտեսական և ներդրումային հեռանկարների լայն քննարկման համար, հնարավոր է եղել միավորել առաջադեմ բիզնեսը մեկ վայրում, և դա նրա հիմնական ձեռքբերումն է: Իմ կարծիքով, ամեն ինչ ստացվել է:
Այս ֆորումի կարևոր նպատակներից մեկն այն է, որ երիտասարդ ձեռնարկատերերը կարողանային պատմել իրենց գաղափարների և նախագծերի մասին, ստանալ փորձառու գործարար համայնքի փորձագիտական գնահատական և խորհրդատվություն, ստանալ նրանց աջակցությունը: Երիտասարդական ձեռներեցության զարգացումը ցանկացած երկրի տնտեսական աճի մեկնակետն է: Մենք տեսանք, թե ինչ հսկայական ստեղծագործական ներուժ ունի Հայաստանի ժամանակակից երիտասարդությունը, որքան տաղանդավոր երիտասարդներ են պատրաստ և ցանկանում են իրագործել սեփական բիզնես գաղափարները:
Գործարար ֆորումի շրջանակներում անցկացվող երիտասարդ ձեռներեցների Buissup Global Forum մրցույթի ժյուրին դիտարկել է մրցույթի մասնակիցների առաջարկած 370 ստարտափ-նախագծերը: Buissup Global Forum-ի եզրափակչի մասնակիցները դրամաշնորհներ են ստացել իրենց գաղափարների իրականացման համար, ինչպես նաև պայմանագրեր այն ընկերություններից, որոնք պատրաստ են ներդրումներ կատարել իրենց ստարտափներում: Բայց ես կարծում եմ, որ այն մասնակիցները, որոնք չեն ընդգրկվել լավագույն 10-ում, չեն վշտանում, քանի որ նրանց տրվել են արժեքավոր խորհուրդներ, որոնք թույլ կտան նրանց ավարտին հասցնելու իրենց նախագծերը: Մենք ցանկանում ենք ամեն տարի անցկացնել այս մրցույթը, աջակցել և օգնել երիտասարդ սերնդին, և գուցե հետագայում նրանց անունները տեսնենք Forbes-ի էջերում:
– Դուք նաև պարբերաբար գրքեր եք խորհուրդ տալիս Instagram-ի ձեր հետևորդներին: Ո՞ր լավագույն 3 գրքերը խորհուրդ կտաք ստարտափների մասնակիցներին և, առհասարակ, բիզնեսում հաջողության ձգտողներին:
Երբ խոսքն այսօրվա դրությամբ իմ լավագույն 3 գրքերի մասին է, առաջինը Ռեյ Դալիոյի «Սկզբունքներն» են: Սա միլիարդատիրոջ ինքնակենսագրությունն է, որը ներկայացնում է իր կանոններն ու սկզբունքները, որոնք թույլ են տվել նրան բառացիորեն զրոյից հիմնել Ամերիկայի խոշորագույններից մեկը դարձած ընկերություն: Բիզնեսի ղեկավարները և սեփականատերերը պետք է պարտադիր կարդան այն: Հաջորդը Ռիդ Հասթինգի և Էրին Մայերի «Ոչ մի կանոնն» է: Օգտագործելով Netflix-ի իրական օրինակը՝ նա ցուցադրում է, որ երիտասարդ ակտիվ մարդիկ իրենց համոզմունքներով կարող են ստեղծել կորպորացիա՝ զերծ բոլոր հնացած կանոններից և ցուցումներից: Եվ վերջապես՝ Պիտեր Թիլի և Բլեյք Մասթերսի «Զրոյից մեկին. նշումներ ստարտափների մասին, կամ ինչպես կառուցել ապագան»: Դա գիրք է ստարտափի բարդության, ձեր գաղափարին և հաջողությանը հավատալու մասին:
– «Տաշիր» ընկերությունների խումբն իրականացնում է տարբեր ծրագրեր Հայաստանում և Արցախում. դրանք երկարաժամկետ ծրագրերում ներդրումներ են և բազմաթիվ բարեգործական ծրագրեր: Ի՞նչ նախագծեր են այժմ իրականացվում, և նախատեսվո՞ւմ է արդյոք բարեգործական նոր ծրագրերի իրականացում:
«Բարեգործական ծրագրերը միշտ եղել են մեր ուշադրության կենտրոնում` ինչպես Ռուսաստանում, այնպես էլ Հայաստանում և Արցախում: Նոր իրականությունը թելադրում է նոր մոտեցում ոչ առևտրային կազմակերպությունների և բարեգործության ոլորտում, և դա, անկասկած, ճիշտ ուղղությամբ տեղաշարժ է: Այնուամենայնիվ, ես ուզում եմ ասել, որ Հայաստանում և Արցախում մենք գործում ենք նույն կերպ, ինչպես միշտ. մենք կառուցում ենք դպրոցներ, հիվանդանոցներ, սպորտային և մշակութային կենտրոններ, աջակցում ենք ցածր եկամուտ ունեցող ընտանիքներին, ստեղծում երեխաների համար կրթական և բժշկական հնարավորություններ և շատ ավելին: Եվ այս ամենը՝ մեր միջոցների հաշվին, առանց լրացուցիչ գործընկերներ ներգրավելու, հիմնադրամներ բացելու և քրաուդֆանդինգի: Սկզբունքը պարզ է. կարող ես, գործիր:
– Դուք օրինակ եք, որ կինը կարող է կայանալ ինչպես ընտանիքում, այնպես էլ բիզնեսում, դուք հավակնոտ եք և ուժեղ: Հավանաբար, սա երկար ճանապարհ է, երբ հասնում ես մի վիճակի, որում հաջողվում է ներդաշնակ կերպով համատեղել այդ ամենը: Ի՞նչ խորհուրդ կտաք կին ստարտափերներին:
– Գաղտնիք չէ, որ մենք՝ կանայք, ունենք ստեղծագործական հսկայական ուժ, սա նաև բիզնեսում է արդիական: Եվ նշանակություն չունի`դուք սկսնակ գործարար եք, թե արդեն կայացած: Կարգապահությունն էական է այդ կանացի ներուժն իրագործելու համար, հատկապես երբ միանգամից բազմաթիվ գործեր կան: Անձամբ ինձ համար սա հաջողության ամենակարևոր բանալին է:
Բացի այդ, ես կնշեի, որ բիզնեսում իրենց ճանապարհը սկսող կանանց համար անհնար է հասնել փոփոխությունների առանց հաստատակամության, անընդհատ ինքնազարգացման և նպատակների հստակ ըմբռնման և առաջնահերթությունները գրագետ սահմանելու: Խորհուրդը, որը կարող եմ տալ, այն է, որ զարգացնեք գլոբալ մտածելակերպ և հավատաք ձեր ուժերին:
Հիմա անհատականությունների ժամանակն է: Բաց եղեք աշխարհի առաջ, ցույց տվեք ձեր անհատականությունը, բայց երբեք մի մոռացեք, որ դուք պատասխանատու եք ձեր կայացրած յուրաքանչյուր որոշման համար: Ի վերջո, մեր այսօրվա ցանկացած գործողություն կերտում է վաղվա պատկերը, աշխարհի, որտեղ կապրեն հաջորդ սերունդները:
Նշենք, որ սեպտեմբերի 20-ին Հայ ձեռներեցների ասոցիացիայի նախաձեռնությամբ և «Տաշիր» ընկերությունների խմբի աջակցությամբ Երևանում անցկացվել է երկրի հիմնական գործարար համաժողովը՝ Armenian Business Forum 2021-ը՝ Հայաստանի և Ռուսաստանի քաղաքական և գործարար շրջանակների ներկայացուցիչների մասնակցությամբ․ ՀՀ վարչապետ Նիկոլ Փաշինյանը, Հայաստանի և Ռուսաստանի փոխվարչապետներ Մհեր Գրիգորյանը և Ալեքսեյ Օվերչուկը, «Տաշիր» ընկերությունների խմբի նախագահ Սամվել Կարապետյանը, «Գազպրոմ մեդիա հոլդինգ» ԲԲԸ ժամանցային հեռուստաալիքների ղեկավար Արթուր Ջանիբեկյանը, ՌԴ ВЭБ ղեկավարի տեղակալ Դանիիլ Ալգուլյանը և այլք: Ֆորումին ներկայացվել են նաև սեպտեմբերի 10-17-ը Դիլիջանում կայացած Buissup Global Forum-ի կրթական և քննարկման հարթակի աշխատանքի արդյունքների հիման վրա ընտրված 10 լավագույն ստարտափ- նախագծերը: Այս նախագծերը ֆինանսական աջակցություն կստանան «Տաշիր» ընկերությունների խմբի կողմից: