«Վանաձորի բժշկական կենտրոն»-ում մանկական վնասվածքաբան-օրթոպեդ Ռուբեն Հակոբյանի կողմից կատարվել է հերթական բարդ վիրահատությունը: Այս մասին հայտնում են հիվանդանոցի մամուլի ծառայությունից։
Բժշկական կենտրոն է ընդունվել 5-ամյա տղա՝ «սինդակտիլիա» պաթոլոգիայով: Մանկական վնասվածքաբան-օրթոպեդի խոսքով՝ իրենց առաջ դրված ամենակարևոր խնդիրն այն էր, որ պետք է կարողանային ոչ միայն մատները ճիշտ առանձնացնել իրարից, այլ նաև հետագայում չառաջանար սպիաձև կոնտրակտուրա, որպեսզի հետագայում մատները կարողանան լիարժեք աշխատել:
Վիրահատությունը տևել է 2,5 ժամ: Կատարվել է «զեթպլաստիկա», որը հաջողությամբ է ավարտվել: Երեխայի ամբողջ մաշկը լիարժեք վերականգնվել է:
Թե՛ վիրահատության ժամանակ, թե՛ հետվիրահատական շրջանում որևէ բորբոքային կամ այլ տիպի բարդություններ չեն առաջացել: Վերականգնվել է մատների ամբողջական շարժունակությունը, փոքրիկը կարողանում է ազատ շարժել մատները, բացել, փակել ու խաղալ:
Հետվիրահատական շրջանը տևել է 14 օր, որից հետո փոքրիկը դուրս է գրվել հիվանդանոցից:
Սինդակտիլիան ձեռքի կամ ոտքի մատների բնածին ձևախախտում է, որի դեպքում երկու կամ ավելի մատներ մասամբ կամ ամբողջովին սերտաճած կամ ձուլված են միմյանց, ինչի հետևանքով միջմատնային տարածությունը մասամբ կամ ամբողջովին փակված է լինում:
