ՀՀ 5-րդ նախագահին դե յուրե ընտրեց «Քաղաքացիական պայմանագիրը», սակայն դե ֆակտո նրան ընտրել է մեկ մարդ։ Այս մասին Armenia Today-ի հետ զրույցում ասաց քաղտեխնոլոգ Արմեն Բադալյանը՝ պարզաբանելով, որ ՀՀ-ում 2018 թվականից գործում է անձնիշխան համակարգ, որի էությունը պետական կառավարման բոլոր ինստիտուտները մեկ մարդու քաղաքական շահի սպասարկմանը ծառայեցնելն է։ Փորձագետի խոսքով՝ Հայաստանում գործող բոլոր ինստիտուտները պետք է առաջնորդվեն լոկ այդ սկզբունքով։
«Նախկին նախագահը ոչ թե իրեն հավատարիմ չէր ծառայում, ծառայո՛ւմ էր, ուղղակի նախկինին ի՛նքը չէր ընտրել, ամեն վայրկյան կարող էին ինչ-որ խնդիրներ լինել, իսկ հիմա նախագահը հավատարիմ ծառայելու է, և վարչապետի ձեռքին լինելու է այն գրիչը, որով նա ստորագրելու է նախագահական հրամանագրեր։ Նա անգամ նոտար չի լինելու, լինելու է ընդամենը գրիչ»,- ասաց Բադալյանը։
Նրա խոսքով՝ բոլորովին կապ չունի, թե ինչ մասնագիտություն ունի նորընտիր նախագահը․ ֆիզիկոս է, մաթեմատիկոս, պատմաբան, թե արևելագետ՝ բացարձակ նշանակություն չունի։ Նա ընդամենը լինելու է գրիչ։
«Չեմ կարծում, որ նախագահի գործունեությունից որևէ գիտակից մարդ սպասելիքներ ունենա։ Նա ոչ մի գործիքակազմ չունի, ունենալու դեպքում էլ սպասարկելու է այդ մեկ մարդու շահերը։ Մի գործիք ավել, մի գործիք պակաս՝ նշանակություն չունի։ Նա մեկ մարդու գրպանում գտնվող պաշտոնյա է, և վերջ»,- ասաց փորձագետը։
Բադալյանը կարծում է, որ ներկա կառավարման համակարգում անգամ Վլադիմիր Պուտինի առաջադրման դեպքում նա կա՛մ պետք է ընդուներ խաղի այս կանոնները, կա՛մ չընտրվեր։
«Կարևոր չի, թե ով է լինելու, կարևորն այն է, թե պատրա՞ստ է այդ մարդը սպասարկել իշխանական շահերը»,- նշեց Բադալյանը։
Հիշեցնենք, որ երեկ՝ մարտի 3-ին, ԱԺ-ը երկրորդ փորձից ՀՀ 5-րդ նախագահ ընտրեց բարձր տեխնոլոգիական արդյունաբերության նախարար Վահագն Խաչատուրանին։ Վերջինիս երդմնակալության արարողությունը տեղի է ունենալու մարտի 13-ին Կարեն Դեմիրճյանի անվան մարզահամերգային համալիրում։
Մանրամասները՝ տեսանյութում։
