Կենսաբանական լաբորատորիաների խնդիրն արդեն բավականին երկար ժամանակ արծարծվում է և աստիճանաբար հայ-ռուսական հարաբերությունների հիմնասյուներից դառնում: Այս մասին Armenia Today-ի հետ զրույցում ասաց քաղտեխնոլոգ Վիգեն Հակոբյանը՝ անդրադառնալով Հայաստանում գործող ԱՄՆ ֆինանսավորմամբ կենսաբանական լաբորատորիաներին:
«Դեռևս մի քանի տարի առաջ այդ մասին արտգործնախարար Լավրովն էր ազդարարում և նույնիսկ պատրաստվում էին որոշակի պայմանագրեր ստորագրել, որպեսզի Ռուսաստանի առաջ էլ բացվեին այդ լաբորատորիաները: Ռուսաստանի համար դա բավականին զգայուն թեմա է, առավել ևս՝ այս ռուս-ուկրաինական պատերազմի ընթացքում մի շարք կենսաբանական լաբարատորիաներ հայտնաբերվեցին, որոնք ըստ Ռուսաստանի պաշտոնյաների՝ ըստ էության, ոչ այդքան խաղաղ նպատակներով ստեղծված կենսաբանական լաբորատորիաներ էին, խոսքը կենսաբանական փաստացի զենքի մասին էր, և գործը հասավ անգամ ՄԱԿ»,- ասաց նա:
Վիգեն Հակոբյանը նկատեց, որ հիմա նորից այդ հարցն առկա է հայ-ռուսական հարաբերություններում, և ՀՀ վարչապետ Նիկոլ Փաշինյանի՝ ՌԴ այցից հետո հրապարակված 30 կետանոց հայ-ռուսական փաստաթղթում հստակ կետ կար, որը վերաբերում էր կենսաբանական լաբորատորիաներին, այսինքն՝ Հայաստանի տարածքում ԱՄՆ-ի կողմից ստեղծված կենսաբանական լաբորատորիաներին:
«Բանն այն է, որ այդ կենսաբանական լաբորատորիաների խնդիրը դարձել է անկյունաքարային ռուս-ուկրաինական հակամարտության ընթացքում և ընդհանրապես անկյունաքարային աշխարհաքաղաքական խնդիր Ռուսաստանի և կոլեկտիվ Արևմուտքի միջև: Այս պարագայում ցանկացած խնդիր, որը կապվում է կենսաբանական լաբորատորիաների հետ, որոնք տեղակայված են Հայաստանում, գերզգայուն թեմա է նաև Ռուսաստանի համար, և վերջին շրջանում Ռուսաստանի իշխանությունները շատ ավելի համառ պահանջում են Հայաստանից, որպեսզի այդ լաբորատորիաները բացվեն, դա սկզբունքային նշանակություն ունի Ռուսաստանի համար»,- ասաց նա և նշեց, որ Հայաստանում գործող տարբեր քանակի լաբորաատորինաերի մասին է լսել՝ 2-12:
«Ես կարծում եմ, որ դա բավականին զգայուն թեմա է նաև Հայաստանի իշխանությունների համար, քանի որ Հայաստանի իշխանությունների համար, կարծում եմ, բավականին բարդ խնդիր է ԱՄՆ ֆինանսավորմամբ լաբորատորիաները բացել և ավելի թափանցիկ դարձնել Ռուսաստանի պահանջով: Չեմ բացառում՝ այդ խնդրի լուծմամբ է պայմանավորված լինելու նաև հետագայում հայ-ռուսական հարաբերությունների ընթացքը»,- ասաց քաղտեխնոլոգը:
Ինչ վերաբերում է հնարավոր վտանգներին, ապա այստեղ դժվար է դրա մասին խոսել, քանի որ դա մասնագետների խնդիր է: «Համենայնդեպս այն, ինչ մենք լսել ենք Ուկարինայում տեղաբաշխված լաբորատորիաների շուրջ, երևի թե հուշում է, որ այդտեղ ընդհանուր առմամբ բավականին լուրջ վտանգ կա երկրների բնակչության համար, որտեղ տեղակայված են այդ բիոլաբորատորիաները: Ցանկալի կլիներ հստակ պատասխան ստանալ Հայաստանի իշխանությունների կողմից, թե ինչ են իրենք մտածում այդ խնդրի շուրջ, և ի վերջո, հնարավորություն կա՞ ավելի թափանցիկ գործունեություն ապահովել, որպեսզի տարբեր տիպի խոսակցություններ, գուցե նաև շահարկումներ չլինեն: Այնուամենայնիվ, հայ-ռուսական հարաբերությունների հետագա զարգացումը որոշ մասով պայմանավորվում է այդ հարցի լուրջ պարզաբանումներով և այդ խնդրի լուծմամբ»,- ասաց նա:
Վիգեն Հակոբյանը նկատեց, որ միշտ չէ, որ հաջողվում է միաժամանակ Ռուսաստանի և Արևուտքի պահանջները բավարարել: «Իմ տպավորությամբ՝ Հայաստանն այս հարցում պետք է որոշակի ընտրություն կատարի՝ հաշվի առնելով այսօրվա աշխարհաքաղաքականությունը և Ռուսաստանի համար այս կենսաբանական լաբորատորիաների գերնշանակությունը»,- ասաց նա և նշեց, որ խուսափել այս անգամ, գուցե, չհաջողվի: