Հայ-թուրքական հարաբերությունների կարգավորման ուղղությամբ հետագա քայլերը կորոշեն երկու երկրների հատուկ ներկայացուցիչները։ Ինչպես հաղորդում է «Անադոլու» գործակալությունը, այս մասին հայտարարել Է Թուրքիայի ԱԳ նախարար Մևլութ Չավուշօղլուն՝ այսօր Անկարայում գործընկեր Սիլվի Բայպո-Թեմոնի հետ համատեղ ասուլիսի ժամանակ:
Չավուշօղլուի խոսքով՝ Թուրքիան կողմ է բոլոր երկրների, այդ թվում՝ Հայաստանի հետ երկխոսությանը։ Նա հիշեցրել է, որ Անկարան ավելի վաղ Անթալիայում կայանալիք դիվանագիտական համաժողովին մասնակցելու հրավեր էր ուղարկել Հայաստանի արտգործնախարար Արարատ Միրզոյանին և Թուրքիայի հետ հարաբերությունների կարգավորման հարցով այդ երկրի հատուկ ներկայացուցիչ Ռուբեն Ռուբինյանին:
Հիշեցնենք, որ Հայաստանի և Թուրքիայի իշխանությունները հարաբերությունների կարգավորման գործընթաց են սկսել։ Երկու կողմերից նշանակվել են հատուկ բանագնացներ։ Հայաստանի արտաքին գործերի նախարարությունը հունվարի 14-ին հաղորդագրություն էր տարածել Մոսկվայում Հայաստան-Թուրքիա կարգավորման գործընթացի հատուկ ներկայացուցիչներ ՀՀ ԱԺ նախագահի տեղակալ Ռուբեն Ռուբինյանի և դեսպան Սերդար Քըլըչի հանդիպման վերաբերյալ։ «Կառուցողական մթնոլորտում կայացած առաջին հանդիպման ընթացքում հատուկ ներկայացուցիչներն իրենց նախնական մտքերն են փոխանակել Հայաստանի և Թուրքիայի միջև երկխոսության միջոցով կարգավորման գործընթացի վերաբերյալ։ Կողմերը համաձայնել են շարունակել լիարժեք կարգավորմանն ուղղված բանակցությունները՝ առանց նախապայմանների։ Երկրորդ հանդիպման ամսաթիվն ու վայրը կորոշվի պատշաճ ժամկետում՝ դիվանագիտական ուղիներով»,- ասված էր հաղորդագրության մեջ։ Ավելի ուշ նույնաբովանդակ հաղորդագրություն էր տարածել նաև Թուրքիայի արտաքին գործերի նախարարությունը:
