Ֆրանսիայի Սենատի մի շարք պատգամավորներ դատապարտել են ԵՄ-ի՝ Ադրբեջանի հետ էներգետիկայի ոլորտում համագործակցությունն ընդլայնելու մտադրությունը՝ այն անվանելով խայտառակություն, դանակ՝ հայերի մեջքին:
«ԵՄ-ի և Ադրբեջանի միջեւ գազային համաձայնագրի նախագիծը դանակ է հայերի մեջքին: Մենք չենք կարող պաշտպանել զոհերին՝ սակարկելով դահիճների հետ։ Ֆրանսիայի անունից Էմանուել Մակրոնը պետք է դատապարտի այդ ստոր համաձայնագիրը»,-գրել է ֆրանսիացի սենատոր Բրյունո Ռետայոն՝ հրապարակելով էներգետիկայի հարցերով եվրահանձնակատար Քադրի Սիմսոնի Twitter-ում արված գրառումը, որը, կարևորելով Ադրբեջանի համագործակցությունը, ընդգծել էր նաև Ադրբեջանի՝ վերականգնվող էներգիայի չօգտագործված ներուժի մասին:
ԵՄ մտադրություններինի սուր է արձագանքել նաև ֆրանսիացի պատգամավոր Անն-Լորանս Պետելը:
«Դադարեցրեք բռնապետերին սիրաշահելը: Դադարեցրեք խայտառակությունը, մենք գազ չենք ուզում: Մենք պետք է վերականգնվող էներգիա արտադրենք: Մենք պետք է աջակցենք հայկական ժողովրդավարությանը»,-Twitter-ում գրել է Անն-Լորանս Պետելը:
Հիշենենք, որ Էներգետիկայի հարցերով եվրահանձնակատար Քադրի Սիմսոնը Ադրբեջանի նախագահ Իլհամ Ալիևի հետ հանդիպման ժամանակ հայտարարել է, որ Բրյուսելը բարձր է գնահատում Ադրբեջանի աջակցությունն ու օգնությունը ԵՄ-ի համար դժվար ժամանակահատվածում էներգետիկ անվտանգության ոլորտում: Ադրբեջանական ԶԼՄ-ները հայտնել էին, որ ԵՄ-ն պատրաստակամություն է հայտնել ընդլայնել Ադրբեջանի հետ համագործակցությունը էլեկտրաէներգետիկայի ոլորտում: