Խորհրդարանական ընդդիմությունը չի շտապում իմպիչմենտի ենթարկել վարչապետ Նիկոլ Փաշինյանին, քանի դեռ բոլոր ռիսկերը չեն վերացվել, գրել է «Ժողովուրդ»-ը՝ վկայակոչելով իր աղբյուրներին։
Ըստ թերթի, իմպիչմենտի հարցը խորհրդարան մտցնելու համար անհրաժեշտ է 36 պատգամավորի ստորագրություն, իսկ այն ընդունելու համար՝ 54։
«Վարչապետին իմպիչմենտ հայտարարելու օրակարգով նիստ հրավիրելու համար պետք է 36 պատգամավոր համապատասխան ձևաթուղթը ստորագրի, ներկայացնի ԱԺ (ընդդիմությունն ունի այդքան ձայն․ անկախ պատգամավոր Իշխան Զաքարյանը Սրբազանի հետ զրույցում չի բացառել միանալ նախաձեռնությանը), ապա 54 պատգամավոր պետք է ներկայանա ԱԺ նիստին, քվորում ապահովի, ինչը, մեծ մասամբ, կախված է խորհրդարանական մեծամասնությունից՝ ՔՊ-ից»,- պարզաբանել է թերթը։
Ըստ թերթի՝ եթե իմպիչմենտի նախաձեռնությունն այս փուլում տապալվի, ապա այն կարող է կրկին օրակարգ մտնել միայն վեց ամիս հետո։
Տավուշի սահմանամերձ գյուղերի բնակիչները բողոքի ակցիաներ էին սկսել ՀՀ ԱԳՆ-ի՝ ապրիլի 19-ին հայտարարությունից հետո, որով Հայաստանն ու Ադրբեջանը պայմանավորվել են սահմանազատման գործընթացն սկսել Տավուշից։ Բնակիչները հայտարարել էին, որ դեմ եմ Հայաստանի զիջումներին։ Մայիսի 4-ին «Տավուշը հանուն հայրենիքի» շարժումը երթ էր սկսել դեպի Երևան, ուր հասել էին մայիսի 9-ին և նույն օրը հանրահավաք անցկացրել՝ հայտարարելով, որ պատրաստվում են ԱԺ-ում վարչապետ Նիկոլ Փաշինյանին անվստահության գործընթաց սկսել։ Սրբազանը հանրահավաքի ժամանակ կոչ էր արել մայիսի 13-ի առավոտից անհնազանդության ակցիաներ սկսել, որոնք շարունակվել են նաև մայիսի 16-ին։ Երևանն ու Բաքուն մայիսի 15-ին ստորագրել էին Տավուշում սահմանի սահմանազատման արձանագրությունը։
Մայիսի 16-ին Կիրանցի բնակիչները, ի նշան բողոքի, երկրորդ անգամ փակել էին Հայաստան-Վրաստան միջպետական ճանապարհը։
