«Զանգեզուրի միջանցքը», որը ՀՀ Սյունիքի մարզով Ադրբեջանը պետք է կապի Նախիջևանի Ինքնավար Հանրապետության հետ, արդեն իրականություն է դառնում։ Ինչպես հաղորդում է Ria.ru-ն՝ այս մասին հայտարարել Է Ադրբեջանի նախագահ Իլհամ Ալիևը՝ ելույթ ունենալով Աշխաբադում՝ Կասպիական վեցերորդ գագաթնաժողովի ժամանակ:
«Հայաստանի հետ հակամարտության կարգավորումից հետո Ադրբեջանն սկսել է լայնածավալ աշխատանքներ իրականացնել Ղարաբաղի և Արևելյան Զանգեզուրի վերակառուցման և վերականգնման ուղղությամբ։ Զանգեզուրի միջանցքն արդեն իրականություն է դառնում»,-ասել նա։
Ավելի վաղ բարձրաստիճան իրազեկ աղբյուրը «Известия»-ին հայտնել էր, որ Մոսկվան Երևանին և Բաքվին օգնել է պայմանավորվել «Զանգեզուրի միջանցքի» ավտոմոբիլային մայրուղու հարցի շուրջ՝ հավելելով, որ մնում է համաձայնեցնել միայն 6 կմ փոքր հատվածը:
«Ադրբեջանն ու Հայաստանը վաղուց արդեն պայմանավորվել են Նախիջեւան երկաթուղային միջանցքի շուրջ՝ դեռեւս անցյալ տարվա աշնանը։ Երևանում ավտոմոբիլային մայրուղու առումով երկար դադար են վերցրել։ Սակայն փոխվարչապետների հանդիպման ժամանակ՝ հունիսի 3–ին կարողացան համաձայնեցնել ապագա մայրուղու երթուղին՝ բացառությամբ 6 կմ բացակա հատվածի: Այնտեղ լեռներ են, և ռուսական «Автодор»-ը փորձագետների է ուղարկում այնտեղ, որպեսզի նրանք պարզ ինժեներական լուծում առաջարկեն», – նշել է աղբյուրը:
Ընդգծվում է, որ հայկական կողմից մայրուղին կանցնի Արաքս գետի երկայնքով։ Մնացած հատվածում, «Известия»-ի զրուցակցի խոսքով, կգործարկվեն հին խորհրդային ճանապարհները, որոնք մինչև 1992 թվականը Նախիջևանը կապել են այս պահի դրությամբ Ադրբեջանի վերահսկողության տակ գտվող Կովսականի հետ՝ հայկական տարածքով:
