Անկարան դատապարտել է մարդկանց թրաֆիքինգի վերաբերյալ ԱՄՆ Պետդեպարտամենտի զեկույցը, որում Թուրքիան ներառվել է այն երկրների ցանկում, որոնք օգտագործում են երեխաներին որպես զինվորներ, հայտնում է Անադոլու գործակալությունը։
Թուրքիայի արտաքին գործերի նախարարությունը հերքել է երեխաներին հավաքագրելու մեղադրանքները և ափսոսանք հայտնել, որ անտեսվել են մարդկանց թրաֆիքինգի կանխարգելմանն ուղղված Թուրքիայի զգալի ջանքերը։
Նշվում է, որ Թուրքիան գործադրում է բոլոր ջանքերը մարդկանց թրաֆիքինգի հետ կապված հանցագործությունները կանխելու, հանցագործներին պատժելու և հանցագործությունների զոհերին պաշտպանելու համար, և այդ համատեքստում երկիրը շարունակում է ջանքերը երկկողմ, տարածաշրջանային և միջազգային համագործակցության հետագա ամրապնդման ուղղությամբ։
Գերատեսչությունը հայտարարել է, որ ԱՄՆ-ի զեկույցում մարդու իրավունքների խնդիրը հերթական անգամ քաղաքականացված է։
«ԱՄՆ-ն, որը ռազմական և ֆինանսական աջակցություն է տրամադրում ահաբեկչական PKK/YPG կազմակերպությանը, որը բռնի կերպով հավաքագրում է երեխաներին Սիրիայում և Իրաքում ահաբեկչական հարձակումներին մասնակցելու համար, պետք է ակնկալեր, որ մինչ Թուրքիայի դեմ նման զրպարտություն սկսելը կբախվեր այս իրողությանը։
Տեղեկատվության աղբյուրների օբյեկտիվությունը լուրջ կասկածներ է առաջացնում, որոնց վրա հիմնված են ԱՄՆ իշխանությունների որոշումները։ Դաշինքի ոգուն անհամատեղելի այս զրպարտությանը կտրվի անհրաժեշտ պատասխան»,- ընդգծել են Թուրքիայի ԱԳՆ-ից։
Գերատեսչությունը նշել է, որ ՄԱԿ-ի Հետաքննող հանձնաժողովի 2023 թվականի սեպտեմբերի 12-ի զեկույցը Սիրիայում իրավիճակի վերաբերյալ արձանագրել է PKK/YPG ահաբեկչական կազմակերպության բազմաթիվ ծանր հանցագործություններ՝ ներառյալ երեխաների հավաքագրումը, նրանց առևանգումը, բանտարկությունը և դպրոցների օգտագործումը ռազմական նպատակներով։
«ԱՄՆ Պետդեպարտամենտի 2022 թվականի Իրաքի կրոնական ազատության մասին զեկույցը ցույց է տալիս, որ PKK-ն առևանգել է հարյուրավոր եզդի երեխաների՝ հարկադիր հավաքագրման և ուղեղների գաղափարական լվացման նպատակով՝ նկատի ունենալով հենց Սինջարի եզդիական համայնքը: Օգտվելով առիթից՝ ցանկանում ենք հիշեցնել, որ անջատողական ահաբեկչական կազմակերպության ռեպրեսիվ գործելակերպի և լուրջ հանցագործությունների ուսումնասիրությունը Միացյալ Նահանգների առաջնային պարտականություններից է։
Թուրքիան հետևում է տարածաշրջանային և միջազգային պայմանագրերին և, ինչպես նախկինում, վճռականորեն կշարունակի իր ջանքերը մարդկանց թրաֆիքինգի հետ կապված հանցագործությունները կանխելու ուղղությամբ»,- ասվում է ԱԳՆ հայտարարության մեջ։
