Ռուս խաղաղապահները բարեգործական կազմակերպությունների ասոցիացիայի հետ Լեռնային Ղարաբաղի դպրոցական և նախադպրոցական հաստատություններին տրամադրվող մարդասիրական ակցիայի շրջանակներում նվիրաբերել են 5 և 3 տոննա ծավալով 14 ջրի բաք՝ խմելու ջրի պահպանման համար:
Այս մասին հայտնում է ՌԴ ՊՆ մամուլի ծառայությունը:
Ջրամբարների փոխանցումից հետո ռուսական խաղաղապահ զորախմբի զինծառայողները պարտավորություններ են ստանձնել դրանք լցնելու և կանոնավոր ջրամատակարարման համար: Խաղաղապահներն ամեն օր ջրամբարները ջուր են լցնում՝ օգտագործելով ջրատար մեքենաներ: Ներկայումս Լեռնային Ղարաբաղի տարածքում խաղաղապահներն ամեն օր խմելու ջուր են տրամադրում ավելի քան 1,5 հազար երեխայի:
«Այս պահին մենք իրականացնում ենք ջրի պաշարների ապահովման ծրագիր, քանի որ ջրի հետ կապված խնդիրներ ունենք Լեռնային Ղարաբաղի տարածքում: Ռուս խաղաղապահ ուժերի հետ մենք իրականացնում ենք այդ գործողությունը, ես նաև ցանկանում եմ իմ և մեր կազմակերպությունների անունից շնորհակալություն հայտնել․ ռուս խաղաղապահ ուժերի նշանակությունն ու օգնությունը վիթխարի է, միասին մենք իրականացնում ենք այն նախագծերը, որոնք էական նշանակություն ունեն: Մենք արդեն 9 ծրագիր ենք իրականացրել միասին, ունենք նաև դպրոցների վերակառուցման նախագծեր՝ խաղաղապահ ուժերի մասնակցությամբ: Շնորհակալություն ռուսական խաղաղապահ ուժերին այնտեղ գտնվելու և օգնելու համար»,- ասել է բարեգործական կազմակերպության ներկայացուցիչ Օլեսյա Պոդոլսկայան:
Ընդհանուր առմամբ, բարերարները խմելու ջրի պահպանման համար ձեռք են բերել 21 ջրի բաք, որոնցից մի քանիսն արդեն հասցվել են Ռուսաստանից և ռուս խաղաղապահների կողմից փոխանցվել Լեռնային Ղարաբաղի դպրոցներին և մանկապարտեզներին: