Ադրբեջանի իշխանություններն առաջարկել են երրորդ հանդիպումն անցկացնել Բաքվում Արցախի ներկայացուցիչների հետ ապրիլի առաջին շաբաթվա ընթացքում, հաղորդում են ադրբեջանական լրատվամիջոցները՝ վկայակոչելով այս երկրի նախագահի վարչակազմին։
Ադրբեջանի նախագահի աշխատակազմը հայտարարել է, որ առաջարկում է «Ղարաբաղի հայ համայնքի ներկայացուցիչներին»՝ «շարունակելով մարտի 1-ին Խոջալու քաղաքում կայացած հանդիպումը և մարտի 13-ի հանդիպման հրավերը»՝ «ապրիլի առաջին շաբաթվա ընթացքում հանդիպում կազմակերպել Բաքու քաղաքում»։ Հայտարարության մեջ նշվում է, որ հանդիպման նպատակը պետք է լինի «վերաինտեգրման, ինչպես նաև Ղարաբաղում ենթակառուցվածքային նախագծերի իրականացման հարցերի քննարկումը»։
Armenia Today-ը կապ հաստատեց Արցախի ԱԳՆ մամուլի ծառայության հետ՝ հաստատելու այս տեղեկությունը։ Նրանք, սակայն, նշեցին, որ այժմ չեն կարող մեկնաբանել այս հարցը և որ թեմայի շուրջ պաշտոնական հայտարարությամբ հանդես կգան օրվա ընթացքում։ Armenia Today-ը գրավոր հարցում էր ուղարկել Արցախի կառավարությանը։
Ավելի վաղ Արցախի ԱԳՆ-ն մերժել էր Ադրբեջանի նախագահի աշխատակազմի առաջարկը՝ Բաքվում Ադրբեջանի ներկայացուցիչների հետ երկրորդ հանդիպում անցկացնելու վերաբերյալ։ Ի պատասխան Ադրբեջանի նախագահի աշխատակազմի առաջարկի՝ Արցախի ԱԳՆ-ն պատասխանել էր, որ Ստեփանակերտը հավատարիմ է «նախկինում հնչեցրած դիրքորոշմանը, որ նման հանդիպումներ կարող են անցկացվել ռուս խաղաղապահների միջնորդությամբ նույն տեղում, ինչ մարտի 1-ին»։
Հիշեցնենք, որ Արցախի և Ադրբեջանի ներկայացուցիչների նախորդ հանդիպումը ռուս խաղաղապահների հրամանատարության մասնակցությամբ տեղի էր ունեցել փետրվարի 24-ին։ Կողմերը հանդիպել էին նաև մեկ շաբաթ անց՝ մարտի 1-ին։ Հանդիպմանը, ըստ ադրբեջանական լրատվամիջոցների, քննարկվել էր «Ղարաբաղի շրջանի հայ բնակիչների վերաինտեգրումն Ադրբեջանի Սահմանադրությանն ու օրենքներին համապատասխան»։ Ինչպես «Արցախպրես»-ին հայտնել էր Արցախի Հանրապետության նախագահի մամուլի քարտուղար Լուսինե Ավանեսյանը, բացի Լաչինի միջանցքով մարդկանց, տրանսպորտային միջոցների և բեռների անխափան տեղաշարժը վերականգնելու, էլեկտրաէներգիայի և գազամատակարարման վերականգնման, ինչպես նաև Կաշենի հանքավայրի շահագործման մտահոգություններից զատ «օրակարգում այլ հարցեր չեն եղել»։
Հանդիպումներից հետո Արցախի նախագահ Արայիկ Հարությունյանը ևս բացառել էր Ադրբեջանի հետ ինտեգրացիոն որևէ գործընթաց: «Սակայն դա չի նշանակում, որ մենք խուսափելու ենք շփումներից՝ ենթակառուցվածքային և հումանիտար բնույթի խնդիրներ լուծելու համար»,- ասել էր նախագահը:
