Ադրբեջանական զինված հանցագործների անօրինական տեղակայումները ապացույցներով ենք հիմնավորել: Այս մասին ֆեյսբուքյան էջում գրել է «Թաթոյան» հիմնադրամի ղեկավար, Մարդու իրավունքների պաշտպան Արման Թաթոյանը:
«Գեղարքունիքի մարզի Սոթք բնակավայրի այս տարածքում անօրինական տեղակայված ադրբեջանական դիրքերից են նաև կրակում մեր գյուղերի հարևանությամբ, վիրավորում պատճառում մեր զինվորներին, որոնք պաշտպանում են մեր գյուղերն ու քաղաքները»,- գրել է Թաթոյանը:
Հիշեցնենք, որ մայիսի 11-ին՝ ժամը 06:00-ից Ադրբեջանի ԶՈւ ստորաբաժանումները հրետանային և ականանետային միջոցներից կրակ են բացել Սոթքի ուղղությամբ տեղակայված հայկական դիրքերի ուղղությամբ: Հայկական կողմն ունի 4 վիրավոր։
Armenia Today-ը, վկայակոչելով համայնքի բնակիչներին և ՀՀ պաշտպանության նախարարությանը, հայտնում է, որ ադրբեջանական կողմը պարբերաբար խախտում է հրադադարի պահպանման ռեժիմը Սոթք գյուղի մերձակայքում գտնվող սահմանային հատվածում։ Ապրիլի 23-ին ադրբեջանական կողմից կրակոցներից հետո Սոթքի սահմանին հայ զինծառայող է զոհվել։ Սոթքի տեղամասում Բաքվի պարբերական հրետակոծությունների պատճառով ապրիլից Սոթքի հանքի տնօրինությունը տասնյակ աշխատողների է ուղարկել հարկադիր արձակուրդի։
Կարդացեք և դիտեք Armenia Today-ի բացառիկ ռեպորտաժն այն մասին, թե ինչպես է ապրում սահմանային Սոթքը, որը 2022 թվականի սեպտեմբերի 13-ին ադրբեջանական զինուժի կրակոցների տակ էր ընկել։
Մանրամասները՝ Թաթոյանի հրապարակած տեսանյութում:
