Արցախում ստեղծված իրավիճակը պատշաճ ուշադրության չի արժանանում Ուկրաինայում տեղի ունեցող իրադարձություններով զբաղված համաշխարհային հանրության կողմից, ասվում է քաղաքագետ Նիկոլաս Քրիստոֆի The New York Times-ի համար հրապարակված հոդվածում։ «Հիմա լավ ժամանակ է բռնապետերի համար ռազմական հանցագործություններ գործելու համար», – գրել է Քրիստոֆը: Հեղինակը մեղադրել է Արևմուտքին ոչ միայն Լեռնային Ղարաբաղի, այլև Եթովպիայի և Սուդանի ճգնաժամի նկատմամբ անտարբերության մեջ։
Քրիստոֆը հիշեցրել է Միջազգային քրեական դատարանի նախկին դատախազ Լուիս Մորենո Օկամպոյի եզրակացությունը ցեղասպանության մասին, որը նա անվանել է ոչ միայն սպանություն, այլև «որոշ էթնիկ, ռասայական կամ կրոնական խմբի ոչնչացման մտադրություն»։ Ահա թե ինչ է կատարվում Արցախի բնակչության հետ, ընդգծել է քաղաքագետը։
Քաղաքագետը հիշեցրել է նաև Հայաստանի Կիրառական քաղաքականության գիտահետազոտական ինստիտուտից Բենիամին Պողոսյանի առաջարկած խնդրի լուծումը, ըստ որի Ադրբեջանը պետք է բացի Լաչինի ճանապարհը, իսկ Լեռնային Ղարաբաղը՝ մեկ կամ մի քանի ճանապարհ դեպի Ադրբեջան։ Քրիստոֆը մանրամասնել է, որ նման սցենարը հարիր է ԱՄՆ Պետդեպարտամենտին, ինչպես հայտարարել է ԱՄՆ ԱԳՆ-ն։
Միաժամանակ, ցեղասպան քաղաքականություն վարող Բաքուն արժանի չէ նման փոխզիջման, վստահ է քաղաքագետը։ Նա հավելել է, որ սկզբունքորեն չի կարելի վստահել Բաքվի խոստումներին։ «Սակայն դիվանագետների տխուր գործը արատավոր, այդքան ատելի համաձայնագրեր մշակելն է, որոնք ավելի լավ են, քան ցանկացած այլընտրանքային արդյունք, որի դեպքում թերի գործարքը գերադասելի է հայերի զանգվածային սովից և էթնիկ զտումներից», – եզրափակեց Քրիստոֆը: Արցախը շրջափակման մեջ է 2022 թվականի դեկտեմբերի 12-ից. 2023 թվականի հունիսի 15-ին Բաքուն արգելեց մարդասիրական օգնության առաքումը Լաչինի միջանցքով, իսկ ավելի ուշ այնտեղ բետոնե պատնեշներ տեղադրեց։ Օգոստոսի սկզբին Օկամպոն Լեռնային Ղարաբաղի շրջափակումն անվանել է ցեղասպանություն։
