Ոստիկանությունը բերման է ենթարկել 155 ցուցարարի։ Այս մասին Armenia Today-ի հայտնեց ՀՀ ոստիկանության ԶԼՄ-ների հետ կապի վարչության պետ Զարզանդ Գաբրիելյանը։
Իր հերթին շարժման առաջնորդ Իշխան Սաղաթելյանը գրում է, որ ոստիկանական բաժանմունքները կոլապսի են ենթարկվել։ Այս պահին բերման ենթարկված ցուցարարների թիվն այնքան մեծ է, որ բաժանմունքներում այլևս տեղ չկա։
«Մեր քաղաքացիներին ավտոբուսներով տեղից տեղ են տանում՝ այդպես էլ չիմանալով, թե վերջիվերջո որ բաժանմունքում նրանց կարող են ընդունել։ Ավելին, տեղեկություններ կան արդեն այն մասին, որ քաղաքի ոչ բանուկ փողոցներում ոստիկանական ավտոբուսները պարզապես կանգնում և ազատ են թողնում բերման ենթարկված ցուցարարներին»,- գրել է նա։
Ինչպես տեղեկանում ենք «Հայաստան» դաշինքի Facebook-ի էջից, երիտասարդները փակել են Աբովյան փողոցը, Մաշտոցի պողոտան՝ Փակ շուկայի հատվածում։ Հարավարևմտյան թաղամասի բնակիչները միացել են անհնազանդության ակցիաներին։ ՀԱԹ-ում փակել են Զորավար Անդրանիկի փողոցը, Շենգավիթ համայնքի Բագրատունյաց փողոցը, Հանրապետության փողոցը, Արշակունյաց-Ագաթանգեղոս խաչմերուկը։
«Դիմադրություն» շարժումն առավոտյան 08։00-ից ողջ մայրաքաղաքում անհնազանդության ակցիաներ է իրականացնում:
Իշխան Սաղաթելյանը երեկ հայտարարել էր, որ առավոտից փակելու են փողոցներ և պարալիզացնելու են մայրաքաղաքի երթևեկությունը։ Նա կոչ է արել սովորողներին դասերի չհաճախել, աշխատողներին չգնալ աշխատանքի՝ տեղեկացնելով գործատուին, և միանալ ընդդիմության պայքարին։
Հիշեցնենք, որ Երևանում արդեն ավելի քան երկու շաբաթ է՝ Նիկոլ Փաշինյանի հրաժարականի պահանջով անհնազանդության ակցիաներ են սկսվել, որոնց ընթացքում փակվում են փողոցներ, իրականացվում են երթեր, հանրահավաքներ, ավտոերթեր դեպի մարզեր։