Armenia Today-ը հարցում է անցկացրել երիտասարդների շրջանում՝ հետաքրքրվելով, թե ինչի մասին են երազում այսօր նրանք:
«Լավ ապագա ունենալու մասին, ամեն օր ինչ-որ նոր բան փոխելու մասին»,- նշում է հարցված երիտասարդներից մեկը:
Քաղաքացիներից շատերն ընդգծում են, որ հիմա հիմնականում բոլորի երազանքը խաղաղ ու ամուր հայրենիք ունենալն է։
«Բոլոր հայերի երազանքը խաղաղությունն է ու ամուր հայրենիքի վրա կանգնելը…», «Ես երազում եմ խաղաղ, կայուն հայրենիքի մասին, որ ամեն քաղաքացի ապրի իրեն արժանի հայրենիքում…»,- նմանատիպ պատասխաններ են հնչեցնում երիտասարդները։
Հարցված աղջիկներից մեկն էլ նկատում է, որ երազանքների մասին չպետք է բարձրաձայնել։
«Չեմ ուզում երազանքներիս մասին ասել, բարձրաձայնել, իսկ ընդհանարպես բոլորն էլ, կարծում եմ, հիմա խաղաղության մասին են երազում»,- ասում է նա։
Մեր հարցման մասնակիցներից մեկն էլ փոքրուց դեռ երազանք է ունեցել դառնալ երգչուհի և մեծ բեմեր դուրս գալ։
«Ես մանկուց երազել եմ հայտնի դառնալ, երգել բեմում, պարել։ Փոքր ժամանակ զբաղվել եմ, հիմա դադարեցրել եմ այս պահին, որովհետև հասկացա, որ կողքիս չկա մարդ, ով կօգնի ինձ։ Հիմա նպատակս ու երազանքս է նաև, որ տեղափոխվեմ Երևան և ապրեմ այստեղ»,- ասում է նա։
Հարցվածներից մեկի համար մեր հարցը բավականին բարդ է։
«Ամենաբարդ հարցն է, դեռ վստահ չեմ՝ ինչ եմ ուզում։ Այս պահին համալսարանն ավարտեմ, որ հետո կարողանամ իմ ցանկացած աշխատանքը գտնել և իմ ուզած կյանքով ապրել, որ փոշմանելու բան չունենամ»,- նկատում է նա։
Հարցվածներից մեկն էլ դեռ չի կողմորոշվել՝ թե ինչ է ցանկանում։
«Ես էլ ցանկանում եմ հասկանալ՝ ի՞նչ եմ ուզում, որ մասնագիտությամբ եմ ուզում զբաղվել, որովհետև շատ մեծ հնարավորություններ կան ու պետք է ընտրես, թե որն ես ուզում. դա դժվար փուլ է»,- շեշտեց զրուցակիցը:
Մանրամասները՝ տեսանյութում:
