Օլիմպիական խաղերի բրոնզե մեդալակիր, աշխարհի ու Եվրոպայի չեմպիոն Արթուր Դավթյանը Դոհայում ընթացող առանձին գործիքների աշխարհի գավաթի խաղարկության երկրորդ փուլում դարձել է ոսկե մեդալակիր, հայտնում է Հայաստանի մարմնամարզության ֆեդերացիան։
Ըստ ֆեդերացիայի՝ Դավթյանը ոսկե մեդալը նվաճել է հենացատկ մարզաձևում։
Հայաստանի ներկայացուցիչներից մարտի 1-ին եզրափակչի ուղեգիր էին նվաճել նաև Արթուր Ավետիսյանը և Վահագն Դավթյանը: Օղակների վարժության որակավորման փուլում Ավետիսյանը 14,766 միավորով զբաղեցրել է երրորդ տեղը, իսկ Վահագն Դավթյանը վաստակել է 14,600 միավոր և 6-րդ տեղով դուրս եկել եզրափակիչ: Ավետիսյանն ու Դավթյանն այսօր հանդես կգան օղակների վարժության եզրափակչում:
Հիշեցնենք, որ աշխարհի գավաթի խաղարկությունը վարկանշային է աշնանը Բելգիայում անցկացվելիք աշխարհի առաջնության առանձին գործիքների մրցման համար, որի ընթացքում կխաղարկվեն Փարիզի Օլիմպիական խաղերի ուղեգրեր։
