Հայաստանը երկամարտի երրորդ ոսկե մեդալն է նվաճել Մոլդովայի մայրաքաղաք Քիշնևում ընթացող ծանրամարտի Մ15 և Մ17 տարեկանների Եվրոպայի առաջնությունում, հայտնում են ԿԳՄՍ նախարարությունից։
Մ17 տարեկանների պայքարում հաղթողի տիտղոսը նվաճել է 76 կգ քաշային Աննա Ամրոյանը՝ երկամարտի 209 կգ արդյունքով (92+117) դառնալով ոսկե մեդալակիր: Ամրոյանը պոկում և հրում վարժություններում ևս արժանացել է փոքր ոսկե մեդալներին:
ԿԳՄՍ-ից հայտնում են, որ, ընդհանուր առմամբ, Հայաստանի թիմն արդեն 7 մեդալ է նվաճել երկամարտում: Արծաթե մեդալակիր է դարձել Հովհաննես Ղահրամանյանը (81 կգ), իսկ Կառլեն Դավթյանը (49 կգ), Յուղաբեր Ամրոյանը (40 կգ) և Ալինա Սուքիասյանը (71կգ) դարձել են բրոնզե մեդալակիրներ:
Հուլիսի 6-ին Հայաստանի ներկայացուցիչներից պատանեկան ԵԱ-ի հաղթող էին ճանաչվել նաև ծանրորդներ Ժորա Գրիգորյանը (61 կգ) և Սերյոժա Բարսեղյանը (67 կգ):
Տեսանյութում երկիրը պատվով ներկայացրած Աննա Ամրոյանն է, որը ՀՀ օրհներգի ժամանակ չի կարողանում զսպել հույզերը։