Առնվազն 17 մարդ Է զոհվել, 41-ը՝ վիրավորվել Քաբուլում շաբաթ գիշերը տեղի ունեցած անկանոն հրաձգության հետևանքով: Այս մասին РИА Новости-ի հաղորդմամբ՝ հայտնում է Tolo News տեղական հեռուստաալիքը։
Հաղորդվում է, որ քաղաքի հիվանդանոցներ են շարունակվում տեղափոխվել վիրավորները՝ հիմնականում քաղաքացիական անձինք։ Ինչպես ավելի վաղ տեղեկացրել էին աֆղանական ԶԼՄ-ները, Քաբուլում «Թալիբանի» զինյալները անկանոն կրակ են բացել՝ այդ կերպ նշելով իրենց չենթարկվող Փանջշեր նահանգի գրավումը։
Տարածաշրջանում ազգային դիմադրության ներկայացուցիչներն արդեն հերքել են այդ նահանգի նկատմամբ ծայրահեղականների կողմից վերահսկողություն սահմանելու մասին տեղեկատվությունը:
Իր հերթին թալիբների ներկայացուցիչ Զաբիհուլլա Մուջահիդը Twitter-ի իր էջում կոչ է արել շարժման գրոհայիններին դադարեցնել Քաբուլում հրաձգությունը, քանի որ դա կարող է վնաս հասցնել տեղի բնակչությանը:
