Ռուսաստանի փոխվարչապետ Ալեքսանդր Նովակը Թուրքիայի առևտրի նախարար Մեհմեդ Մուշի հետ քննարկել է երկկողմ համագործակցության հեռանկարները, հայտնում է ՌԴ կառավարության մամուլի ծառայությունը։ Նշվում է, որ ՌԴ նախագահի օգնականներ Իգոր Լևիտինի և Մաքսիմ Օրեշկինի մասնակցությամբ բանակցությունների ընթացքում կողմերը քննարկել են երկու երկրների երկկողմ համագործակցության առանցքային հարցեր։ Բանակցությունների մասնակիցները նշել են, որ Ռուսաստանի և Թուրքիայի միջև համագործակցությունը գտնվում է բարձր մակարդակի վրա և շարունակում է զարգանալ։
Ըստ զեկույցի՝ «երկկողմ համագործակցության շրջանակում առանձնահատուկ տեղ է գրավում էներգետիկ ոլորտը. հաջողությամբ գործում են «Թուրքական հոսք» և «Կապույտ հոսք» գազատարները, շարունակվում է թուրքական առաջին «Աքքույու» ատոմակայանի շինարարությունը։ Երկրների միջև համագործակցությունը զարգանում է նաև տրանսպորտի և լոգիստիկայի, արդյունաբերության և գյուղատնտեսության, զբոսաշրջության ոլորտներում:
«Հանդիպումից հետո կողմերը մտադրություն են հայտնել ընդլայնել երկրների փոխգործակցությունը տնտեսության առանցքային ոլորտներում»,- ասվում է հաղորդագրության մեջ։
Ավելի վաղ Armenia Today-ը հայտնել էր հունիսին Ռուսաստան թուրքական ապրանքների արտահանման աճի մասին։
