Իսրայելի Հայֆա քաղաքում տեղի է ունեցել Հայոց ցեղասպանության հրապարակի բացումը, հայտնում է Հայ առաքելական եկեղեցու Երուսաղեմի պատրիարքարանի դիվանապետ Աղան Գոգչեանը։
Բացման արարողությանը, որը տեղի ունեցավ մարտի 20-ին, ներկա են եղել Հայ առաքելական եկեղեցու Երուսաղեմի պատրիարքարանի, Իսրայելի հայ համայնքի, Հայֆայի քաղաքային խորհրդի ներկայացուցիչներ։
Իսրայելի Ynet հրատարակությունը մարտի 13-ին հայտնել էր, որ Իսրայելում Թուրքիայի դեսպան Շաքիր Օզքան Թորունլերը դիմել է Իսրայելի կառավարությանը, որպեսզի թույլ չտան քաղաքում Հայոց ցեղասպանության զոհերի հուշարձանի տեղադրումը։ Թորունլերը նամակը հղել էր Իսրայելի մշակույթի և սպորտի նախարար Միկի Զոհարին։ Նախարարը ձեռնպահ էր մնացել նամակին պատասխանելուց և այն վերահղել էր Իսրայելի ԱԳՆ-ին, որն էլ, իր հերթին, խորհուրդ էր տվել անպատասխան թողնել Թորունլերի նամակը։
«Եթե Անկարան պնդի պատասխան ստանալ, «պետք է ասել, որ դա [Հայֆայի] քաղաքային խորհրդի որոշումն է, և պետությունը չի կարող միջամտել դրան», – նշել է հրատարակությունը՝ վկայակոչելով իսրայելցի դիվանագետների առաջարկությունը։ Հայոց ցեղասպանությունը պաշտոնապես ճանաչելու և նրա զոհերի հիշատակին հուշարձան կանգնեցնելու որոշումը Հայֆայի քաղաքային խորհուրդն ընդունել էր մոտ երկու ամիս առաջ, հիշեցրել է Ynet-ը։
Այս որոշումից հետո Հայֆան դարձավ Իսրայելի երկրորդ քաղաքը, որը ճանաչել է Հայոց ցեղասպանությունը՝ Պետահ Տիկվայից հետո։ Հայֆան Իսրայելի երրորդ ամենամեծ նավահանգստային քաղաքն է, որը գտնվում է երկրի հյուսիսում։