Հունիսի 7-ին ՌԴ-ում բացվել էր Էդմոնդ Պետրոսյանի «Առեղծվածներ Լեռնային Ղարաբաղից»-ը խորագրով ցուցահանդեսը։ Սակայն, արդեն հունիսի 14-ին թանգարանի կայքում ցուցադրությունը սկսեց կոչվել «Էդմոնդ Պետրոսյան. առեղծվածներ», իսկ ցուցահանդեսի նկարագրության մեջ նկարչի հայրենի քաղաքը՝ Ստեփանակերտը նշելիս, փակագծերում նշվում է Ադրբեջանում օգտագործվող Խանքենդի անունը։ Ավելին, հանվել է ցուցահանդեսի պաստառը, որը պարունակում էր ցուցահանդեսի նախնական անվանումը։
Նշենք, որ Էդմոնդ Պետրոսյանը ծնվել, մեծացել և մահացել է Լեռնային Ղարաբաղում։
Նա բազմաթիվ կտավներ է նվիրել իր հայրենիքին, որոնք ներկայացված են Արևելքի թանգարանի ցուցահանդեսում։ Նրա հայրենիքի անունը ջնջելն անհարգալից վերաբերմունք է ոչ միայն արվեստագետի կյանքի ու ստեղծագործության, այլև Լեռնային Ղարաբաղի բոլոր բնակիչների նկատմամբ։ Ընդ որում, Էդմոնդ Պետրոսյանն ապրել ու աշխատել է ոչ թե Խանքենդիում, այլՍտեփանակերտում։
Այս գործողությունը հակասություն է մտցնում Ռուսաստանի Դաշնության ներսում ազգամիջյան հարաբերությունների մեջ, ինչպես նաև ստեղծում է Ռուսաստանի թշնամական պատկերացում Հայաստանում և Լեռնային Ղարաբաղում այն ժամանակ, երբ ռուս խաղաղապահները պահպանում են խաղաղությունն այս տարածքում։
Կառավարության նիստից հետո ճեպազրույցների ժամանակ Armenia Today-հարց ուղղեց ԿԳՄՍ նախարար Վահրամ Դումանյանին, թե նման դեպքերում ի՞նչ գործառույթ է կատարում նախարարությունը, որպեսզի չխեղաթյուրվի հայոց պատմությունը։
Նախարար Դումանյանը տեղյակ չէր այս խնդրից՝ ասելով, որ առաջին անգամ է լսում։ Խոստացավ մեր բարձրացրած ահազանգից հետո խնդրին հետամուտ լինել։
Ինչ վերաբերում է ցուցադրությունից «Լեռնային Ղարաբաղ» արտահայտությունը հանելուն՝ նշեց․ «Ես Լեռնային Ղարաբաղ արտահայտությանը շատ լավ եմ վերաբերվում։ Չգիտեմ՝ ով է հանել։ Դուք ուզում եք, որ ձեր ասածի վերաբերյալ պաշտոնական հայտարարություն անեմ, մի հատ հասկանանք՝ ինչ է եղել։ Կծանոթանանք խնդրին, նոր կարծիք կհայտնենք»։
