Ամերիկացի դերասան Ջո Մանգանիելոն PBS հեռուստաալիքի Finding Your Roots սերիալի համար պատմել է Հայոց ցեղասպանությունը վերապրած իր նախատատի պատմությունը, գրում է Daily mail-ը։
«1915 թվականին՝ Առաջին համաշխարհային պատերազմի քողի տակ, թուրքերը մտել են նրա տուն և գնդակահարել ամուսնուն։ Նա պառկել է հատակին` ձևանալով, թե մահացած է, մինչ յոթ կրակոց է հնչել, ինչի հետևանքով զոհվել են նրա յոթ երեխաները»,- պատմել է Մանգանիելոն:
Դերասանը պատմել է, որ իր նախատատն անշարժ պառկած է եղել՝ մեռած ձևանալով, մինչ թուրքերը դուրս են եկել տնից՝ ութերորդ երեխային թողնելով օրորոցում՝ սովամահ լինելու համար։ Նա հավելել է, որ նա «հրաշքով» հաջողվել է խուսափել «մահվան երթից»։
«Մահվան երթերի ժամանակ պարզապես ձեռնաշղթաներ էին կապում հայերին, շղթայում նրանց միմյանց և դուրս էին բերում անապատ, իսկ քրդերին բաց էին թողնում, նրանց զինվորական վերարկուներ, ձիեր և հրացաններ էին տալիս, որպեսզի նրանք գնան և անեն՝ ինչ ցանկանում են անել իրենց մահացու թշնամիների՝ հայերի հետ», – ասում է Մանգանիելոն՝ նշելով, որ իր նախատատուն հաջողվել է խուսափել դրանից:
Փախուստի ժամանակ, դերասանի խոսքով, նախատատը լողալով անցել է Եփրատ գետը, բայց երբ հասել է մյուս ափին, տեսել է, որ «մեջքին կապած երեխան խեղդվել է»։
«Նա ապրել է քարանձավում այլ փախստականների հետ, մինչև նրանց տարել են գերմանացի զինվորականները»,- նշել է դերասանը:
Նա հավելել է, որ իր նախատատը հղիացել է զինվորական ճամբարում գերմանացի սպայից և «ծննդաբերել է շատ գունատ աղջկա, որը դարձել է իր մայրական տատիկը»։
Մանգանիելոն առավել հայտնի է Սեմ Ռայմիի «Սարդ-մարդու» եռերգության Ֆլեշ Թոմփսոնի և «Իրական արյուն» ֆիլմում Ալսիդե Գերվոյի դերերով։