Այսօր առավոտյան ձերբակալվել է առաջին անձը, որի նկատմամբ հանրային քրեական հետապնդում է հարուցված: Այս մասին Կառավարության նիստի ընթացքում հայտնեց ՀՀ գլխավոր դատախազ Աննա Վարդապետյանը՝ անդրադառնալով 15 զինծառայողի կյանք խլած զորամասային հրդեհին։
Նա հայտնեց, որ նախաքննության շահից ելնելով՝ չի ցանկանում բացահայտել այն անձանց հաջորդականությունը, որոնց նկատմամբ այդ գործողություններն իրականացվելու են։
«Բոլոր անձանց նկատմամբ խափանման միջոցի հարցերն են քննարկվելու: Դրա ուղղությամբ կան ստրատեգիական լուծումներ: Համադրվում են կանոնադրությունները, կանոնագրքերը, բոլոր բլանկետային նորմերը և քրեաիրավական նորմերը՝ հասկանալու համար, թե ով ինչ չի արել անվտանգության կանոններն ապահովելու տեսանկյունից»,- արձանագրեց նա:
Վարդապետյանի հաղորդմամբ՝ զինդատախազը հրաման է արձակել բոլոր կայազորների զինվորական դատախազներին ամենասեղմ ժամկետում տրամադրել տեղեկատվություն բոլոր զորանոցներում կենցաղավարման կանոնների, կեցավայրի կահավորման հետ կապված, օրինակ, թե ինչո՞վ են ապահովված ծածկերը, օրինակ՝ կա՞ արդյոք 2-րդ ելք, որպեսզի թակարդի էֆեկտ չստեղծվի, ինչպես այս ողբերգության ընթացքում։
«Հիմնական վարկածը, որի շուրջ քննությունն իրականացվում է, և կարծես թե այս պահի դրությամբ ունենք ապացույցների անհրաժեշտ բազան, որով մեղադրանք ենք առաջադրում, կառավարության նիստի ընթացքում հրապարակված վարկածն է»,- ասաց Վարդապետյանը:
ՔԿ նախագահ Արգիշտի Քյարամյանն իր հերթին ասաց, որ բոլոր հարցաքննված վկաները վկայում են ի սկզբանե առաջ քաշված՝ բենզինով վառարանը վառելու վարկածը:
ՀՀ վարչապետ Նիկոլ Փաշինյանն էլ շեշտեց, որ քննությունը պետք է լինի ամբողջական, քանի որ իրավապահները որևէ բանով կաշկանդված չեն:
