Հայաստանի և Ադրբեջանի արտգործնախարարներն 2020 թվականի նոյեմբերից ի վեր առաջին անգամ հանդիպում են ունեցել։
Ղարաբաղյան հակամարտության կարգավորման ԵԱՀԿ Մինսկի խմբի համանախագահներ Իգոր Խովաևը (Ռուսաստան), Ստեֆան Վիսկոնտին (Ֆրանսիա), Էնդրյու Շոֆերը (ԱՄՆ) համատեղ հայտարարությամբ հայտնել են 2020 թվականի նոյեմբերից ի վեր Հայաստանի և Ադրբեջանի արտգործնախարարների առաջին հանդիպման մասին, որն անցկացվել է Նյու Յորքում ՄԱԿ-ի Գլխավոր ասամբլեայի 76-րդ նստաշրջանի շրջանակներում:
«Համանախագահներն առանձին հանդիպումներ են ունեցել Հայաստանի և Ադրբեջանի արտգործնախարարներ Արարատ Միրզոյանի և Ջեյհուն Բայրամովի հետ, ինչպես նաև համատեղ հանդիպում երկու նախարարների հետ: Համանախագահները ողջունել են արտգործնախարարների առաջին հանդիպումը 2020 թվականի նոյեմբերից ի վեր՝ ի նշան երկու երկրների վճռականության՝ խաղաղության գործընթացը վերսկսելու ուղիղ երկխոսության միջոցով, որը ուղղված է տարածաշրջանում անվտանգության, կայունության և բարգավաճման ապահովմանը»,- ասված է ԵԱՀԿ կայքում տեղադրված միջնորդների հայտարարության մեջ:
Նշվում է, որ համանախագահները, իրենց լիազորությունների համաձայն, վերահաստատում են իրենց հանձնառությունը շարունակելու աշխատանքը կողմերի հետ` հակամարտությունից կամ դրանից բխող մնացած բոլոր հարցերի համապարփակ լուծումներ գտնելու համար:
Հայտարարության մեջ միջնորդներն առաջարկել են իրավիճակի դեէսկալացիային ուղղված հատուկ նպատակային միջոցառումներ և հնարավոր հաջորդ քայլերը: Նրանք հանդիպել են ՄԱԿ-ի գլխավոր քարտուղարի քաղաքական հարցերով տեղակալ Ռոզմարի Դիկարլոյի և ԵԱՀԿ գործող նախագահ, Շվեդիայի արտաքին գործերի նախարար Անն Լինդեի հետ`վերջին մեկ տարվա իրենց ջանքերի, ինչպես նաև վերջին զարգացումների մասին նրանց տեղեկացնելու համար: Հանդիպմանը ներկա է եղել ԵԱՀԿ գործող նախագահի անձնական ներկայացուցիչ Անջեյ Կասպրշիկը:
