Խաղաղության պայմանագրի՝ փետրվարին փոխանցած տարբերակը պատրաստ էի նաև Մյունխենում ստորագրել։ Խաղաղության պայմանագրի ստորագրման ժամկետի վերաբերյալ Armenia Today-ի հարցին ի պատասխան այսօրվա ասուլիսի ժամանակ հայտարարեց Նիկոլ Փաշինյանը։
Նա ընդգծեց, որ խոսքը Երևանի կողմից Բաքվին ուղարկված փաստաթղթի մասին է։ «Ինչո՞ւ չեմ ստորագրել, որովհետև Ադրբեջանը չի համաձայնել այդ տարբերակին»,- ասաց Փաշինյանը։
Վարչապետը շեշտեց՝ եթե այդպես ստացվեր, այսինքն, եթե այդ տարբերակով ստորագրեր, դա ոչ թե վատ, այլ լավ նորություն կլիներ։
«Այսինքն, այն տարբերակը, որը փոխանցում ենք Ադրբեջանին, համարեք, որ այդ տարբերակի տակ իմ ստորագրությունը կա, քանի որ մենք չենք խաղում, չենք ուզում ժամանակ ձգել»,- ասաց նա։
Անդրադառնալով Բրյուսելում սպասվելիք հանդիպման վերաբերյալ հարցին, ինչի մասին ավելի վաղ հայտարարել էր ԱՄՆ պետդեպը, Փաշինյանը հայտարարեց, որ բրյուսելյան ձևաչափում ֆունդամենտալ խնդիր կա։
«Այդ խնդիրը հետևյալն է․ մենք բազմաթիվ հարցերի շուրջ ենք պայմանավորվել, բայց գրեթե ոչ մի պայմանավորվածություն չի կատարվել»,- ասաց Փաշինյանը։
Ավելի վաղ ՀՀ վարչապետ Նիկոլ Փաշինյանը հայտնել էր, որ Ադրբեջանը դեռևս չի պատասխանել խաղաղության պայմանագրի վերաբերյալ Երևանի նոր առաջարկներին: Փաշինյանը հիշեցրել էր, որ կողմերն արդեն երեք անգամ խաղաղության առաջարկներ են փոխանակել։
Արդեն այսօրվա ասուլիսի ժամանակ Փաշինյանը հայտարարեց, որ Հայաստանը օրերս Բաքվից ստացել է հայկական առաջարկների պատասխանը։
Մանրամասները՝ տեսանյութում։
