Հայաստանի վարչապետ Նիկոլ Փաշինյանը Politico-ին տված հարցազրույցում հայտարարել է, որ Երևանը ցանկանում է նվազեցնել կախվածությունը Ռուսաստանից, որպեսզի չհայտնվի Արևմուտքի և Արևելքի բախումների կենտրոնում։
«Եթե մենք ուզում ենք ունենալ անկախ, ինքնիշխան պետություն, իսկ մենք դա ուզում ենք, հարկավոր է այս հարցերի շուրջ ունենալ լուծումներ, զարգացումներ։ Կրկնում եմ՝ առավելագույնս խուսափելով՝ արևելք-արևմուտք, հյուսիս-հարավ բախումների կիզակետում հայտնվելուց և թատերաբեմ դառնալուց »,- ասել է Փաշինյանը՝ անդրադառնալով հարցին, թե արդյո՞ք անկախություն ձեռք բերելը նշանակում է հեռանա՞լ այն հարաբերություններից, որտեղ Ռուսաստանը մոնոպոլիա ունի ՀՀ անվտանգության, էներգետիկ համակարգի, և մի շարք այլ բնագավառների հանդեպ։
Պատասխանելով հարցին, թե ռուսական խաղաղապահ առաքելության ձախողման պատճառը անգործունակությու՞նն է, Ուկրաինայի պատերազմով գերզբաղվածությո՞ւնը, թե՞ մտածված որոշում՝ խուսափելու Ադրբեջանին և Թուրքիային զայրացնելուց, վարչապետը նշել է․ «Գիտեք, կարծում եմ, երկու գործոններն էլ ունեն որոշակի դերակատարում, որովհետև Ուկրաինայի իրադարձությունների հետևանքով Ռուսաստանի հնարավորությունները փոխվել են, բայց մյուս կողմից կարծում եմ նաև կա երկրորդ գործոնը, որը Դուք նշեցիք: Թե առաջին, և թե երկրորդ գործոնը, իմ գնահատմամբ, առկա է»։
ՀՀ վարչապետը «խոցելի» է անվանել այն մոդելը, երբ Հայաստանը տարածաշրջանում իր հարևանների հետ խնդիրների դեպքում կդիմի այլ երկրների պաշտպանությունը։ «Այն մոդելը, որ մենք պրոբլեմներ կունենանք մեր հարևանների հետ և այդ պրոբլեմների մեջ մեզ պաշտպանելու համար կհրավիրենք ուրիշներին՝ խոցելի մոդել է»,- ասել է վարչապետը` նշելով, որ Երևանի ռազմավարությունը պետք է լինի «հնարավորինս նվազեցնել ուրիշներից կախվածությունը»։
«Ռուսաստանի և ՀԱՊԿ-ի մեր հարաբերությունների հետ կապված այդտեղ մենք լիարժեք թափանցիկ ենք: Ի՞նչ խնդիրներ կան այդտեղ, ի՞նչ հարցեր. մենք դրա մասին խոսել ենք և շարունակելու ենք խոսել և՛ հրապարակային, և՛ աշխատանքային մակարդակներում: Այդ խոսակցությունը բխում է, իհարկե, Հայաստանի պետական շահերից, և մենք առաջնորդվում ենք Հայաստանի պետական շահերով: Ընդհանրապես, ես չեմ ուզում և չի կարող լինել այդպես՝ Հայաստանը որևէ կարգի պրոքսիի դերում դիտարկել: Հայաստանի Հանրապետությունը, իհարկե, շատ լուրջ անվտանգային խնդիր ունեցող երկիր է, բայց անվտանգային խնդիրների հասցեագրումը մենք տեսնում ենք ինքնիշխանության, անկախության ամրապնդմամբ: Եվ մենք ինչպես նախկինում, այսօր, վաղն ամեն ինչ անելու ենք մեր ինքնիշխանությունը, մեր անկախությունը, մեր անվտանգությունն ապահովելու համար»,- ընդգծել է Փաշինյանը։
Միևնույն ժամանակ, ընդունելով Ռուսաստանից կախվածությունից հեռանալու անհրաժեշտությունը, Փաշինյանը նշել է, որ դեռ երկար ճանապարհ կա անցնելու, մինչև արևմտյան երկրները ընկալվեն որպես Հայաստանին անհրաժեշտ լիակատար աջակցություն ցուցաբերող, գրում է թերթը։ «Եվրամիությունը և Միացյալ Նահանգները մեզ աջակցում են նաև ժողովրդավարական բարեփոխումների օրակարգը հասցեագրելիս։ Բայց ես չեմ կարող ասել, որ այն օգնությունը և աջակցությունը, որ մենք ստանում ենք, բավարար է մեր խնդիրները և օրակարգերը սպասարկելու համար։ Բայց մյուս կողմից էլ, մենք ակտիվ աշխատում ենք մեր բոլոր գործընկերների հետ՝ մեր դիրքորոշումները նրանց ավելի հասկանալի դարձնելու և որպես արդյունք՝ ավելի մեծ աջակցություն ստանալու համար։»,- ասել է ՀՀ վարչապետը։
Սեպտեմբերի 3-ին Նիկոլ Փաշինյանը La Repubblica-ին տված հարցազրույցում «ռազմավարական սխալ» էր անվանել Հայաստանի անվտանգության կախվածությունը մեկ կենտրոնից։ ՌԴ ԱԳՆ-ն արձագանքել է՝ Փաշինյանին մեղադրելով անպատասխանատու լինելու և իր սխալների մեղավորներին գտնելու մեջ։ Ավելի ուշ Հայաստանի խորհրդարանի նախագահ Ալեն Սիմոնյանը և ՌԴ ԱԳՆ ներկայացուցիչ Մարիա Զախարովան կոշտ հայտարարություններ են փոխանակել։ Սեպտեմբերի 8-ին Մոսկվայում Հայաստանի դեսպան Վաղարշակ Հարությունյանը կանչվել է ՌԴ ԱԳՆ, որտեղ նրան «կոշտ նոտա» է ներկայացվել։
