Ռուսաստանը որոշակի դեր է խաղացել Լեռնային Ղարաբաղի հակամարտության կարգավորման գործում։ Այս մասին հունիսի 30-ին «Ուղիղ գիծ Վլադիմիր Պուտինի հետ» ամենամյա հեռուստակամուրջի ընթացքում հայտարարել է Ռուսաստանի Դաշնության նախագահ Վլադիմիր Պուտինը։
Նրա խոսքով՝ ոչ ոք շահագրգռված չէ, որ այդ լուրջ ճգնաժամը խորանա՝ ո՛չ Ադրբեջանը, ո՛չ Հայաստանը, ո՛չ էլ առավել ևս Լեռնային Ղարաբաղի բնակիչները: Եթե բոլորը համերաշխ ու խաղաղ ապրեն, հնարավորություններ կստեղծվեն մարդկանց կյանքը բարելավելու համար՝ ոչ միայն անվտանգության ոլորտում, այլ նաև ընթացիկ մյուս հարցերում։
«Այստեղ ես նկատի ունեմ ընտանիքների նորմալ գոյությունը, տարածաշրջանի սոցիալական և տնտեսական զարգացումը, ինչում, անշուշտ, շահագրգռված են Ղարաբաղում բնակվող մարդիկ»,- նշել է ռուսական պետության ղեկավարը՝ հավելելով, որ Ղարաբաղի բնակիչները դրա կարիքը շատ ունեն, որովհետև զինված հակամարտության վերսկսման ռիսկերով պայմանավորված անհնար է անընդհատ տագնապով ապրել։
Դա, ըստ Պուտինի, հասկանում են ինչպես Հայաստանի, այնպես էլ Ադրբեջանի ղեկավարները։
«Այո, իսկապես շատ խնդիրներ են կուտակվել։ Ես կարծում եմ, որ դա շատ կարևոր է: Կան հարցեր, որոնք կապված են նորմալ ենթակառուցվածքի վերականգնման, սահմանազատման հետ, հատկապես այնտեղ, որտեղ պետական սահմանը, ըստ էության, երբեք չի եղել, եղել է միայն վարչական սահման միութենական հանրապետությունների միջև»,- ասել է Պուտինը՝ հավելելով, որ այժմ նման աշխատանք է տարվում, ստեղծվել է Ռուսաստան-Ադրբեջան-Հայաստան հատուկ եռակողմ հանձնաժողովը, և ամեն ինչ արվում է տարածաշրջանում նորմալ հարաբերությունները վերականգնելու համար, իսկ այդ աշխատանքի շահառուները կլինեն Լեռնային Ղարաբաղի բնակիչները։
«Ես ցանկանում եմ մտածել, որ այդպես էլ կլինի, չնայած բոլոր դժվարություններին, որոնք կուտակվել են տասնամյակներ շարունակ»,- ընդգծել է Ռուսաստանի նախագահը: