Հայաստանի բժշկական հանրության ներկայացուցիչները բողոքի ակցիա են իրականացրել Երևանում ՄԱԿ-ի ներկայացուցչության դիմաց՝ ի աջակցություն Արցախի: Միջոցառմանը մասնակցում էին Երևանի պետական բժշկական համալսարանի բժիշկներ, բուժքույրեր, ուսանողներ։
Ակցիայի մասնակիցներն պարզել էին «Նման հումանիտար աղետ ստեղծելը ֆաշիզմ է», «Սպանված աղավնին Ադրբեջանի նպատակն է», «Ադրբեջանը սպանում է հիվանդներին, ովքեր ունեն դեղորայքի կարիք» և այլ պաստառներ։
Ակցիայի մասնակիցները կոչ են արել բոլոր միջազգային կազմակերպություններին գործադրել բոլոր ջանքերը՝ ապահովելու Արցախի բնակիչների կյանքի և առողջության իրավունքը:
«Խոսքս ուղղում եմ միջազգային հումանիտար կառույցներին, որոնք զբաղվում են տարբեր սոցիալական խավերի իրավունքների պաշտպանությամբ», – նշեց բժիշկ Ռուբեն Գրիգորյանը։
Նրանք նաև ընդգծել են, որ յուրաքանչյուր հայ աշխարհի ցանկացած կետում պարտավոր է լինել Արցախի կողքին։
Հիշեցնենք, որ դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին:
Ադրբեջանական կողմը դեկտեմբերի 13-ին նաև փակել է Արցախի գազամատակարարումը։
Արցախի պետնախարար Ռուբեն Վարդանյանն գլխավորությամբ ստեղծվել է օպերատիվ շտաբ, որը գործելու է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով:
Դեկտեմբերի 14-ից սկսած բողոքի ակցիաներ են սկսվել ՀՀ-ում տարբեր կառույցների ներկայացուցչությունների և դեսպանությունների մոտ։
Նշենք նաև, որ Կառավարության նիստում վարչապետ Նիկոլ Փաշինյանը հայտարարել է, որ Ադրբեջանը շարունակաբար իրագործում է «Լեռնային Ղարաբաղն առանց հայերի» քաղաքականություն և հայկական կողմն ամեն ինչ պետք է անենք, որ այս քաղաքականությունը պատշաճ միջազգային գնահատականի արժանանա:
Դեկտեմբերի 16-ի վաղ առավոտյան Արցախի պետնախարարը հայտնեց, որ վերականգնվել է Արցախի գազամատակարարումը: