Լեռնային Ղարաբաղից բռնի տեղահանվածները հնարավորություն կունենան պարզեցված ընթացակարգով գրանցել իրենց կողմից օգտագործվող մեքենաները, հայտնում է ՀՀ ՆԳՆ-ն։
Կառավարության որոշման համաձայն` Լեռնային Ղարաբաղից բռնի տեղահանված անձինք մասնավոր սեփականություն չհանդիսացող, սակայն իրավաչափորեն իրենց տիրապետման տակ գտնվող կամ իրենց կողմից օգտագործվող տրանսպորտային միջոցների նկատմամբ սեփականության իրավունքի գրանցումը կարող են իրականացնել անխոչընդոտ, պարզեցված և արտոնյալ ընթացակարգով։
Ըստ ՆԳՆ-ի՝ որոշման համար հիմք է հանդիսացել այն հանգամանքը, որ բռնի տեղահանման արդյունքում ՀՀ-ում են հայտնվել մասնավոր սեփականություն չհանդիսացող թեթև մարդատար ավտոմոբիլներ, որոնք ունենալով փաստացի օգտագործողներ՝ դեռևս չեն հանդիսանում սեփականության իրավունքի օրինական օբյեկտ:
Նախատեսվում է մինչև 2017թ. արտադրության թեթև մարդատար ավտոմոբիլների նկատմամբ սեփականության իրավունքի պետական գրանցման ժամանակ բռնի տեղահանված անձանցից չպահանջել տրանսպորտային միջոցի ձեռք բերման օրինականությունը հավաստող փաստաթուղթ և սեփականության իրավունքի գրանցումը կատարել նշված տրանսպորտային միջոցների տիրապետման կամ օգտագործման օրինականությունը հավաստող այլ փաստաթղթի հիման վրա։
Շահառուները կազատվեն նաև փոխադրամիջոցի գույքահարկի պարտավորությունների ամբողջական կատարման մասին տեղեկանք ներկայացնելու պարտականությունից։ Սահմանված ընթացակարգը գործելու է մինչև 2025թ. հուլիսի 1-ը դիմելու դեպքում:
2023-ի սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության դեմ։ Ռազմական ագրեսիայի հետևանքով զոհվել էր 223, վիրավորվել՝ 244 մարդ, գերեվարվել են 17-ը, անհետ կորել՝ 20-ը։ Արցախից բռնի տեղահանված 100 632 քաղաքացի էր գաղթել ՀՀ։