Կատարի ռազմաօդային ուժերի ինքնաթիռը Քաբուլ Է բերել կատարցի տեխնիկական մասնագետներին, որոնք կուսումնասիրեն Համիդ Քարզայի անվան միջազգային օդանավակայանի վիճակը և կորոշեն, թե ինչպես վերականգնել դրա աշխատանքը, հաղորդում է «Интерфакс»-ը՝ հղում անելով Doha News-ին։
«Թալիբանի» ներկայացուցիչը «Ալ Արաբիա» հեռուստաալիքի եթերում հայտարարել է, որ թալիբները Կատարին խնդրել են օգնել օդանավակայանի աշխատանքի շուտափույթ վերականգնման հարցում: Տեղեկացվել է նաև, որ նմանատիպ թեման քննարկվել է նաև Թուրքիայի ղեկավարության հետ:
Ավելի վաղ հայտնի էր դարձել, որ արտասահմանյան ինքնաթիռը սեպտեմբերի 1-ին առաջին անգամ վայրէջք է կատարել Քաբուլում՝ այնտեղից արտասահմանցի զինվորականների հեռանալուց հետո: Դա Կատարի ռազմաօդային ուժերի ինքնաթիռն էր։
«Ալ Ջազիրա» հեռուստաալիքը սեպտեմբերի 1-ին հայտնել է, որ Քաբուլի օդանավակայանը արտասահմանյան զորքերի հեռանալուց հետո չի կարող գործել: Ըստ նրա՝ թե՛ տերմինալները, թե՛ տարածքը թալանվել են, թաղվել աղբով ու շարքից դուրս եկած տեխնիկայով։
Պենտագոնի ներկայացուցիչն ասել է, որ զինվորականները շարքից հանել են այն սարքավորումները, որոնք կարելի էր օգտագործել ռազմական նպատակներով, սակայն խաղաղ նշանակության տեխնիկային ձեռք չեն տվել: Ընդ որում, ԱՄՆ-ի քաղաքացիական ավիացիայի դաշնային վարչությունից հայտնել են, որ Քաբուլի օդանավակայանը մնացել է առանց դիսպետչերների: