Հրդեհից տուժել է ողջ համայնքը։ Արոտավայրերի հիմնական մասերը հրդեհվեցին․ խոտհարքերը, որոնք պետք է գյուղացիները բերեին, նույնպես այրվել են։ Մարդիկ զրկվել են իրենց ձմեռվա պաշարից։ Այս մասին լրագրողների հետ զրույցում ասաց Գեղամասարի համայնքապետ Հակոբ Ավետյանը։
Նա նշեց, որ անասնապահությունն այսօր լուրջ խնդիր է։ Մսի գինն իջել է 1100-1200 դրամ։
«Մարդիկ ո՛չ կարող են անասունները ծախել, ո՛չ կարող են 2 200 դրամով խոտ առնել, որ կով պահեն։ Կովի գնից շատ ծախս է արվում անասունի վրա»,- ասաց համայնքապետը։
Նա նաև նշեց, որ շրջանառվող 40 հեկտար տարածքը վերջնական չի։ Կարճ ժամանակ անց այրման տարածքը կարող է ավելանալ, քանի որ այս պահին էլ հրդեհը շարունակվում է։
Եթե չկա արոտավայր, անասունի ինքնարժեքն ավելին է, քան եկամուտը, ապա անասնապահությունը, ըստ Ավետյանի, հարցականի տակ է։
Armenia Today-ի հարցին ի պատասխան՝ համայնքապետն ասաց, որ ինքն անձամբ անհանգստացած է կարտոֆիլի բերքահավաքով, քանի որ ունի 220 հեկտար կարտոֆիլ, իսկ տվյալ տարածքները թշնամու թիրախի տակ են։
Մտահոգություն է անգամ երեխաներին դպրոց ուղարկելու հարցը։ Դպրոցները նույնպես թշնամու ուղիղ թիրախի տակ են։ Թշնամին էլ տմարդի է ու անկանխատեսելի։
Մանրամասները՝ տեսանյութում։