Ադրբեջանի գլխավոր դատախազությունը հայտարարել է հինգ ռուս խաղաղապահների սպանության և մեկ խաղաղապահի վիրավորման փաստով քրեական գործեր հարուցելու մասին։ Գերատեսչությունը խաղաղապահների ուղղությամբ կրակոցը բացատրել է նրանով, որ ադրբեջանցի զինվորականները Ղարաբաղում RMK մեքենան շփոթել են հայ զինվորականների մեքենայի հետ, հաղորդում են ադրբեջանական լրատվամիջոցները։
Սեպտեմբերի 19-ին Ադրբեջանը լայնամասշտաբ հարձակում է սկսել Արցախի Հանրապետության նկատմամբ։ Ադրբեջանի ՊՆ-ն նշել էր, որ, իբր, քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»: Վերջին տվյալներով Արցախի դեմ ադրբեջանական ագրեսիայի հետևանքով կա 200 զոհ (10 խաղաղ բնակիչ, այդ թվում՝ 5 երեխա) և 400 վիրավոր (40 խաղաղ բնակիչ, այդ թվում՝ 13 երեխա)։
Սեպտեմբերի 20-ին ՌԴ պաշտպանության նախարարությունը հայտարարել էր Լեռնային Ղարաբաղում խաղաղապահների մահվան մասին։ Սեպտեմբերի 21-ին Ադրբեջանն ընդունել էր իր մեղքը ռուս խաղաղապահների սպանության համար։ Նախագահ Իլհամ Ալիևը Ռուսաստանի առաջնորդ Վլադիմիր Պուտինի հետ հեռախոսազրույցում ներողություն էր խնդրել խաղաղապահների մահվան համար։
