Լոս Անջելեսի հայ համայնքը ի պաշտպանություն Արցախի բողոքի ակցիա է անցկացրել Ռոնալդ Ռեյգանի գրադարանում, որտեղ նախատեսված են ԱՄՆ Հանրապետական կուսակցության թեկնածուների բանավեճերը, հայտնում է ՀՅԴ-ն սոցիալական ցանցերում։
Հայերը հանրապետականներին կոչ են արել ԱՄՆ իշխանություններից պահանջել պատժամիջոցներ կիրառել Ադրբեջանի դեմ նրա ցեղասպան քաղաքականության համար և մարդասիրական օգնություն ուղարկել Լեռնային Ղարաբաղ։
Սեպտեմբերի 26-ին Ամերիկայի Հայ դատի հանձնախումբն(ANCA) ԱՄՆ ավելի քան 80 կոնգրեսականների հետ առցանց ճեպազրույցում կոչ էր արել նրանց ճնշում գործադրել Ջո Բայդենի վարչակազմի վրա՝ ամերիկացի դիտորդներ տեղակայելու հումանիտար միջանցքի երկայնքով և պատժամիջոցներ կիրառելու Բաքվի դեմ։
Սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ։ Ադրբեջանի ՊՆ-ն նշել էր, որ, իբր, քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»: Վերջին տվյալներով՝ Արցախի դեմ ադրբեջանական ագրեսիայի հետևանքով կա 200 զոհ (10 խաղաղ բնակիչ, այդ թվում՝ 5 երեխա) և 400 վիրավոր (40 խաղաղ բնակիչ, այդ թվում՝ 13 երեխա)։
ԼՂ-ում տեղակայված ռուսական խաղաղապահ զորակազմի հրամանատարության միջնորդությամբ պայմանավորվածություն էր ձեռք բերվել 2023 թվականի սեպտեմբերի 20-ի ժամը 13:00-ից մարտական գործողություններն ամբողջությամբ դադարեցնելու մասին, որի պայմաններն էին՝ հայկական զինված կազմավորումները վայր են դնում զենքերը, լքում մարտական դիրքերն ու ամբողջությամբ զինաթափվում, հանձնվում է ողջ սպառազինությունն ու ծանր տեխնիկան։
Պայմանավորվածության համաձայն՝ սեպտեմբերի 21-ին Եվլախում տեղի էր ունեցել Արցախի և Ադրբեջանի ներկայացուցիչների հանդիպումը։ Ստեփանակերտը հայտնել էր, որ կողմերը հատուկ ընդգծել են, որ առկա բոլոր հարցերն անհրաժեշտ է քննարկել խաղաղ մթնոլորտում՝ հանդիպումները շարունակելու պատրաստակամությամբ։